វ៉ាក់សាំងកូវីដ១៩របស់ក្រុមហ៊ុន Pfizer-BioNTech ទទួលបានការចុះបញ្ជីអោយប្រេីប្រាស់បន្ទាន់ដំបូងគេពីអង្គការសុខភាពពិភពលោក
បរទេស៖ អង្គការសុខភាពពិភពលោក (WHO) បានផ្តល់សុពលភាពជាបន្ទាន់ដល់វ៉ាក់សាំង Pfizer-BioNTech កាលពីថ្ងៃព្រហស្បតិ៍ ទី៣១ ខែធ្នូ ដែលធ្វើឱ្យវាក្លាយជាវ៉ាក់សាំងដំបូងគដបង្អស់ ដែលទទួលបានត្រាយល់ព្រមពីអង្គការសុខភាពពិភពលោកដែលត្រួសត្រាយផ្លូវសម្រាប់វាឱ្យកាន់តែទូលំទូលាយនៅទូទាំងពិភពលោក។
នៅក្នុងសេចក្តីថ្លែងការណ៍មួយអង្គការសុខភាពពិភពលោក (WHO) បានអោយដឹងថា ខ្លួនបានចុះបញ្ជីវ៉ាក់សាំង Comirnaty COVID-19 mRNA សម្រាប់ការប្រើប្រាស់ជាបន្ទាន់ដែលធ្វើឱ្យវ៉ាក់សាំង Pfizer-BioNTech ដំបូងទទួលបានសុពលភាពបន្ទាន់ពីអង្គការសុខភាពពិភពលោក។
បញ្ជីប្រើប្រាស់បន្ទាន់របស់អង្គការសុខភាពពិភពលោក (EUL) បានបើកទ្វារសម្រាប់ប្រទេសនានាពន្លឿនដំណើរការនៃការអនុម័តបទប្បញ្ញត្តិផ្ទាល់ខ្លួនដើម្បីនាំចូលនិងគ្រប់គ្រងវ៉ាក់សាំង។
WHO បាននិយាយថា ការពិនិត្យវ៉ាក់សាំងរបស់ក្រុមហ៊ុន Pfizer-BioNTech រកឃើញថាវាត្រូវតាមលក្ខណៈវិនិច្ឆ័យដែលមានសុវត្ថិភាពនិងប្រសិទ្ធភាព និងអត្ថប្រយោជន៍នៃការប្រើប្រាស់។
គួរជម្រាបថា វ៉ាក់សាំងកូវីដ១៩របស់ក្រុមហ៊ុន Pfizer-BioNTech ដែលមានប្រសិទ្ធិភាព ៩៥ ភាគរយត្រូវបានអនុញ្ញាតឱ្យប្រើប្រាស់នៅក្នុងប្រទេសជាង ៤៥ រួមមានចក្រភពអង់គ្លេសសហរដ្ឋអាមេរិកនិងសហភាពអឺរ៉ុប។ មនុស្សរាប់សែននាក់បានទទួលការចាក់ថ្នាំបង្ការនេះរួចមកហើយ៕
