ប្រធានផ្សារបឹងកេងកង យកអំណោយសប្បុរសជន ចែកជូនអាជីវករវ័យចំណាស់ និងអ្នករត់ម៉ូតូកង់បីចំនួន៣២០នាក់
ភ្នំពេញ៖បងប្អូនអាជីវករមានវ័យចំណាស់ដែលប្រកបមុខរបរលក់ដូរអីវ៉ាន់ឬទំនិញ ពោលគឺបន្លែបង្ការត្រីសាច់គ្របមុខតាមកញ្ជើរកញ្ជ្រែងលក់ចល័តក្នុងផ្សារបឹងកេងកងនិងបងៗកម្លាំងម៉ូតូកងបី,ម៉ូតូឌុបចំនួន៣២០នាក់ដែលមានជីវភាពខ្វះខាតត្រូវបានទទួលការអាណិតអាសូរពីសំណាក់លោកប្រធានផ្សារបឹងកេងកង និង លោកជំទាវសៀង ម៉ារី ដោយបានយកអំណោយទៅជួយឧបត្ថម្ភឬចែកជូនដល់ដៃពួកគាត់នៅក្នុងបរិវេណផ្សារបឹងកេងកងដែលស្ថិតនៅក្នុងមូលដ្ឋានខណ្ឌបឹងកេងកង រាជធានីភ្នំពេញនាថ្ងៃទី០២ខែកុម្ភះឆ្នាំ២០២១នេះ។
លោកឯក និមល ប្រធានផ្សារបឹងកេងកងបានអោយដឹងថា ចំពោះអំណោយសប្បុរសធម៌របស់លោកជំទាវខាងលើដែលផ្ដល់ជូនអាជីវករមានជីវភាពខ្វះខាតនិងអ្នករត់ម៉ូតូឌុប ម៉ូតូកង់បីនាឱកាសនោះដោយក្នុងម្នាក់ៗទទួលបានសារ៉ុង១និងថវិកា១មុឺនរៀលផងដែរ។
លោកឯក និមល ប្រធានផ្សារបឹងកេងកងបានមានមតិបញ្ជាក់ថា រាល់សកម្មភាពនាពេលនេះគឺជាការអនុវត្តន៍តាមអនុសាសន៍របស់ថ្នាក់ដឹកនាំ។លោកប្រធានផ្សារបឹងកេងកងបន្តទៀតថាថ្វីអំណោយទាំងនេះមានបរិមាណមិនច្រើនក្ដី តែនេះគឺជាទឹកចិត្តដ៏ប្រពៃក្នុងការអាណិតអាសូររបស់លោកជំទាវខាងលើនិងគណៈកម្មការផ្សារ ហើយអំណោយនេះនឹងបានជួយចែករំលែករាល់ការលំបាកបានមួយគ្រាផងដែរពោលគឺបានតិចប្រសើរជាងអត់។
ឆ្លៀតក្នុងឱកាសនោះដែរលោកឯក និមល បានរំលឹកដល់បងប្អូនអាជីវករនិងអ្នកប្រកបមុខរបររត់ម៉ូតូឌុប និង ម៉ូតូកង់បីទាំងអស់អោយមើលថែទាំសុខភាព និង អនុវត្តន៍វិធានការដោយបង្ការ ទប់ស្កាត់តាមការណែនាំរបស់ក្រសួងសុខាភិបាលពោលគឺយើងរួបរួមគ្នាប្រយុទ្ធប្រឆាំងមេរោគកូវីដ១៩ ៕