ក្រសួងវប្បធម៌ កោះហៅអាជី អាម៉ី និងអ្នកសម្តែងរឿង «ទុំទាវ ២០២១» ទៅបំភ្លឺ
ភ្នំពេញ៖ក្រុមអ្នកលក់ឡេពង្រីកដើមទ្រូង អាជី និងអាម៉ី ថតរឿង «ទុំទាវ ២០២១» ត្រូវបានរីករាលដាលយកទៅផ្សព្វផ្សាយបន្តនៅលើបណ្តាញសង្គម Tik Tok ដែលបង្កឲ្យមានការរិះគន់យ៉ាងខ្លាំង។
វីដេអូរឿង «ទុំទាវ ២០២១» នេះផងដែរ ដែលដឹកនាំសម្តែងដោយមេក្រុមឈ្មោះ AhGi Leader ត្រូវបានមហាជនមើលឃើញថា មានឈុតឆាកកាយវិការដ៏មិនសមរម្យច្រើន ជាពិសេសបានយកតួអង្គតំណាងឲ្យព្រះសង្ឃ បែរមកសម្តែងក្នុងលក្ខណៈបែបកំប្លែងលេងសើចដ៏មិនសមរម្យ ដែលធ្វើឲ្យប៉ះពាល់យ៉ាងធ្ងន់ធ្ងរ ទៅដល់តម្លៃព្រះពុទ្ធសាសនា តម្លៃវប្បធម៌ជាតិ និងសីលធម៌សង្គម។
ហើយបើទោះជាកញ្ញា អាជី និងប្អូនស្រី អាម៉ី បានលុបចោលវីដេអូនោះ និងក៏ដូចចេញមុខសុំទោសជាសាធារណៈ នូវរាល់កំហុសឆ្គងរបស់ក្រុមសម្តែងខ្លួន ខណៈមហាជនដែលមានការខឹងសម្បារខ្លាំង បានថ្កោលទោសយ៉ាងដាច់អហង្ការ និងជម្រុញឲ្យក្រសួងពាក់ព័ន្ធចាត់វិធានការ ទៅលើក្រុមនេះឲ្យបានដាច់ខាត ដើម្បីទុកជាការព្រមានដល់អ្នកក្រោយៗ។
ពាក់ព័ន្ធករណីខាងលើនេះ នៅថ្ងៃទី៤ ខែកុម្ភៈ នេះ លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាវិន័យ និងលើកសរសើរ បានចេញលិខិតអញ្ជើញម្ចាស់ផេក Hokima និងអ្នកសម្ដែងរឿង ទុំទាវ ក្នុងផេក Hokima ចូលទៅកាន់ទីស្ដីការក្រសួងវប្បធម៌ និងវិចិត្រសិល្បៈ បន្ទប់លេខាធិការដ្ឋានក្រុមប្រឹក្សាពិន័យនិងលើកសរសើរ នៅថ្ងៃពុធ ទី១០ ខែកុម្ភៈ ឆ្នាំ២០២១ ខាងមុខ ក្រោយមានការរិះគន់ខ្លាំងពីសំណាក់មហាជន ដើម្បីចូលមកបំភ្លឺ ករណីការថតកាឡៃរឿងទុំទាវ ដែលធ្វើឲ្យមានផលប៉ះពាល់ដល់សាសនា វប្បធម៌ជាតិ និងប្រពៃណីជាតិ។ ម្ចាស់ផេក និងអ្នកសម្តែងរឿងទុំទាវ ទាំងអស់ ត្រូវចូលខ្លួនមកបំភ្លឺឲ្យទាន់ពេលវេលាតាមកាលបរិច្ឆេទខាងលើជាកំហិត។ បើពុំដូច្នេះទេ ក្រសួងនឹងបន្តនីតិវិធីចាត់វិធានការតាមផ្លូវច្បាប់ ដោយការចាំបាច់៕