នគរបាលខណ្ឌឬស្សីកែវ ឃាត់ខ្លួនជនសង្ស័យ២នាក់ ឆក់ទូរស័ព្ទដៃពីក្នុងហាង
ភ្នំពេញ ៖ កម្លាំងល្បាតនគរបាលខណ្ឌ និងប៉ុស្តិ៍ទួលសង្កែ២ បានបង្ក្រាបជាក់ស្តែងនូវជនសង្ស័យ២នាក់ ខណៈរកទិញទូរស័ព្ទក្នុងហាងមួយកន្លែង ហើយឆក់រត់ឡើងម៉ូតូ បំរុងជិះគេចខ្លួន ក៏ត្រូវកម្លាំងនគរបាល ចាប់ឃាត់បានភ្លាមៗ ។
ករណីបង្ក្រាបជាក់ស្តែងនេះ កើតឡើងនៅ វេលាម៉ោង១៣ និង០០នាទី ថ្ងៃទី០៤ ខែកុម្ភៈ ឆ្នាំ ២០២១ នៅចំណុចហាងលក់ទូរសព្ទយីហោ(ប្រណិត) ផ្លូវ៥៩៨ក្រុមទី ២ ភូមិពងពាយ សង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ។
លោកអធិការខណ្ឌ ហ៊ាង ថារ៉េត បានអោយដឹងថា ជនរងគ្រោះឈ្មោះ ឆ គីមសេង ភេទប្រុស អាយុ ៣២ឆ្នាំ ស្នាក់នៅផ្ទះលេខC42 ភូមិទួលសំពៅ សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ។
ចំណែកជនសង្ស័យទី១ ឈ្មោះ ប៊ុន ផាន់ណា ភេទប្រុស អាយុ ២២ឆ្នាំ ស្នាក់នៅភូមិធា សង្កាត់វត្តអង្គខាងត្បូង ស្រុកបន្ទាយមាស ខេត្តកំពត មុខរបរមិនពិតប្រាកដ ។ ជនសង្ស័យទី២ ឈ្មោះ រុំ ឃៀង ភេទប្រុស អាយុ ២១ឆ្នាំ ស្នាក់នៅភូមិសំរោងលើ ស្រុកបន្ទាយមាស ខេត្តកំពត មុខរបរមិនពិតប្រាកដ ។ជាមួយគ្នានេះ នគរបាលបានដកហូតសម្ភារៈ រួមមាន៖ ម៉ូតូមួយគ្រឿង ម៉ាកហុងដាអាសង់ពណ៌ខ្មៅស៊េរីឆ្នាំ២០២០ ពាក់ស្លាកលេខ1 iH 1753 ។ និងទូរសព្ទ ២គ្រឿង ម៉ាក vivo y30 និងម៉ាក samsung កាឡាក់ស៊ី អេសធែន ដោយបានប្រគល់ជូនជនរងគ្រោះវិញ ។
បើតាមលោក ហ៊ាង ថារ៉េត អធិការខណ្ឌប្ញស្សីកែវ បានបញ្ជាក់ថា នៅថ្ងៃ ខែ ឆ្នាំខាងលើជនសង្ស័យទាំង២នាក់ បានជិះម៉ូតូម៉ាកហុងដា សេ១២៥ មករកទិញទូរសព្ទនៅហាងទូរស័ព្ទរបស់ជនរងគ្រោះ ដោយបានសុំមើលទូរស័ព្ទ ហើយជនសង្ស័យម្នាក់ទៀត ឈ្មោះ ប៊ុន ផាន់ណា ក៏ទៅអង្គុយចាំលើម៉ូតូស្រេច រួចជនសង្ស័យដែលកាន់ទូរសព្ទឈ្មោះ រុំ ឃៀង ក៏រត់ឡើងម៉ូតូជិះគេចខ្លួន តែក៏ត្រូវម្ចាស់ហាងស្រែកឆោឡោស្របពេលកម្លាំងល្បាតខណ្ឌ និងប៉ុស្តិ៍ បានប្រទះឃើញក៏ឃាត់ខ្លួនបាន។
បច្ចុប្បន្ន កំលាំងជំនាញខណ្ឌ កំពុងកសាងសំណុំរឿងបញ្ជូនជនសង្ស័យទាំង២នាក់ ទៅសាលាដំបូងរាជធានីភ្នំពេញតាមនិតិវិធី។