អភិបាលខណ្ឌច្បារអំពៅ ចុះបញ្ជាកម្លាំងផ្ទាល់ ក្រោយចរាចរណ៍ផ្លូវជាតិលេខ១ មានការកកស្ទះខ្លាំងព្រឹកមិញ
ភ្នំពេញ ៖ បន្ទាប់ពីស្ថានភាពចរាចរណ៍ផ្លូវជាតិលេខ១ (ចំណុចត្រើយខាងកើតគល់ស្ពានព្រះមុន្នីវង្ស) ត្រូវបានកកកុញស្ទះណែនណាន់តាន់តាប់ កាលពីវេលាព្រឹកមិញ ថ្ងៃទី០៨ ខែកុម្ភៈ ឆ្នាំ២០២១ គេសង្គេតឃើញវត្តមានរបស់លោកចេង មុនីរ៉ា អភិបាលខណ្ឌច្បារអំពៅ បានចុះដោយផ្ទាល់ដល់ទីតាំងកកស្ទះ ដើម្បីបញ្ជារដល់កម្លាំងសណ្តាប់ធ្នាប់ខណ្ឌ និងនគរបាលចរារណ៍ ក្នុងការឈរសម្រួល និងរំដោះការកកកុញស្ទះ ។
ការកកស្ទះខាងលើ គឺមានចម្ងាយប្រមាណ ៣គីឡូម៉ែត្រ គិតចាប់ពីបុរីប៉េងហួតបឹងស្នោរ ដល់ចំណុចគល់ស្ពានព្រះមុន្នីវង្សចាស់ថ្មី នៃខណ្ឌច្បារអំពៅ រាជធានីភ្នំពេញ ។
លោកចេង មុនីរ៉ា អោយដឹងថា មូលហេតុនៃការកកស្ទះ គឺដោយសារក្រុមការងារជំនាញ បាននឹងកំពុងជួសជុលបង្កាន់ដៃស្ពាន និងកន្លែងថ្មើរជើង នៃស្ពានព្រះមុន្នីវង្សចាស់ ដែលបានខូចខាត ដោយការជួសជុលនោះ គឺត្រូវជួសជុលប្រវែង៣ម៉ែត្រសងខាង ប៉ុន្តែជួសជុលត្រូវជួសជុលម្តងម្ខាង ។ ដែលកត្តានេះហើយធ្វើស្ថានភាពចរាចរណ៍នៅលើស្ពានហាក់មានភាពចង្អៀត ទើបបង្កអោយមានជាការកកស្ទះ នៅបែកខាងច្បារអំពៅ ។
ទន្ទឹមនឹងការជួសជុលនោះ លោកអភិបាលខណ្ឌក៏បានដាក់កម្លាំងនគរបាល និងកម្លាំងសណ្តាប់ធ្នាប់សង្កាត់ខណ្ឌជាច្រើននាក់ ក្នុងការចុះជួយសម្រួល ដល់ការកកស្ទះជាប្រចាំផងដែរ នោតាមបណ្តាគោលដៅសម្ខាន់ៗ ពិសេសចំណុចស្តុបផ្សារច្បារអំពៅ និងនៅលើស្ពានព្រះមុន្នីវង្សចាស់ជាដើម ។
លោកអភិបាលខណ្ឌ ស្នើដល់ពលរដ្ឋអ្នកដំណើរទាំងឡាយ ដែលបានធ្វើដំណើរឆ្លងកាត់ផ្លូវជាតិលេខ១ ចំណុចដែលតែងតែកកស្ទះខាងលើ មេត្តាមានការអធ្យាស្រ័យ និងយោគយល់ខ្ពស់ផង ចំពោះបញ្ហាកកស្ទះដែលបានរំខានដល់ពេលវេលា និងកិច្ចការងារជាក់ស្តែងរបស់បងប្អូន ។ ប៉ុន្តែទន្ទឹមនឹងនោះ ក្នុងនាមថ្នាក់ដឹកនាំរដ្ឋបាលខណ្ឌ នឹងខិតខំបន្ត ក្នុងការដាក់កម្លាំងពាក់ព័ន្ធ ក្នុងការចុះឈរសម្រួលជាប្រចាំជានិច្ច ។
គួរបញ្ជាក់ថា នាពេលបច្ចុប្បន្ននេះ ប្រទេសកំពុងស្ថិតក្នុងការអភិវឌ្ឍន៍កាន់តែជឿនលឿនទៅមុខ ធ្វើអោយហេដ្ឋារចនាសម្ព័ន្ធផ្សេងៗក្នុងប្រទេសមានការរីកលូតលាស់ ពិសេសនោះកំណើនយានយន្ត និងយាន្តជំនិះ ក៏មានការលក់កើនឡើងយ៉ាងសន្ធប់ ស្របនឹងកំណើន ប្រជាជនបច្ចុប្បន្នក៏ច្រើនផងដែរ ។ កត្តា នៃការកើនឡើង នៃចំនួនប្រជាជន និងយានយន្ត ឬយានជំនិះនេះហើយ ក៏ជាផ្នែកមួយតូច ដែលបង្កអោយមាននូវការកកស្ទះចរាចរណ៍នៅតាមដងផ្លូវផងដែរ ពិសេសនោះ គឺការកកកុញស្ទះនៅពេលព្រឹកឡើងម៉ោង៧ និងល្ងាចម៉ោង៥ ដែលជាវេលាដែលបងប្អូនពលរដ្ឋចេញទៅ ឬមកពី ធ្វើការងារ ទៅរកស៊ី ទៅរៀនទៅសូត្រ ជាដើម ។
សូមចូលរួមគោរពច្បាប់ចរាចរណ៍ទាំងអស់គ្នា ដោយបើកបរចេះគោរពអាធ្រាស្រ័យគ្នាទៅវិញទៅមក មិនបំពានគ្នា គោរពភ្លើងស្តុប និងពាក់មួកសុវត្ថិភាព និងបំពាក់កញ្ចក់អោយបានខ្ជាប់ខ្ជួនជានិច្ច ដើម្បីអាយុជីវិតអ្នក និងអាយុជីវិតអ្នកដំណើរដទៃទៀត ៕
