បុរសម្នាក់ជិះម៉ូតូបុករបាំងថ្ម បណ្តាលឲ្យដួលបោកក្បាលនៅនឹងថ្នល់ស្លាប់ភ្លាមៗ
ភ្នំពេញ ៖ បុរស់ម្នាក់ជិះម៉ូតូលឿនពេកជ្រុលទៅបុករបាំងថ្មពេញទំហឹងបណ្តាលឲ្យដួលអូសម៉ូតូទៅមុខជាច្រើនម៉ែត្រ បោកក្បាលនឹងថ្នល់ស្លាប់ក្នុងថ្លុកឈាមនៅវេលាម៉ោង២ និង ៥០នាទីយប់រំលងអធ្រាត្រឈានចូលថ្ងៃអង្គារទី៩ ខែកុម្ភៈ ឆ្នាំ ២០២១ ស្ថិតនៅតាមបណ្តោយផ្លូវ សហព័ន្ធរុស្ស៊ី ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
សពមានឈ្មោះចេស្ដា ភេទប្រុសអាយុ ២០ឆ្នាំជាង មានស្រុកកំណើតនៅក្នុងសង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។
ប្រភពព័ត៌មានពីមិត្តភក្តិជនរងគ្រោះនៅកន្លែងកើតហេតុ បានឲ្យដឹងថា មុនពេលកើតហេតុជនរងគ្រោះបានជិះមូតូមួយគ្រឿងម៉ាកហុងដាទ្រីមសង់ សេ១២៥ពណ៌ខ្មៅពាក់ផ្លាកលេខ ភ្នំពេញ 1-HS 6632 ធ្វើដំណើរតាមបណ្តោយផ្លូវ សហព័ន្ធរុស្ស៊ី ក្នុងទិសដៅពីកើតមកលិចក្នុងល្បឿនលឿន ខណៈមកដល់ចំណុចកើតហេតុមិនប្រយ័ត្នស្រាប់តែរេចង្កូតជ្រុលទៅបុកនឹងរបាំងថ្មពុះចែកទ្រូងផ្លូវពេញទំហឹង បណ្តាលឲ្យដួលម៉ូតូអូសទៅមុខជាច្រើនម៉ែត្រ បោកក្បាលនឹងថ្នល់ស្លាប់៕