គំនិតឡឺកឺ ៖ បន្ថយអំណាចរដ្ឋ រាស្ត្រមានអំណាច
ភ្នំពេញ៖ឥឡូវនេះគេចូលចិត្តនិយាយតែពីរឿងផ្ដល់អំណាចឲ្យរាស្ត្រនាយខ្ញុំចេះតែឆ្ងល់ត់រាស្ត្រយកអំណាចទៅធ្វើអ្វី ? ឬក៏យកទៅដើម្បីកុម្មង់ទិញយន្ដហោះពីអាមេរិក ទិញកាំជ្រួចពីចិន ?
ឃើញគណៈបក្សមួយចំនួននៅក្នុងបាវចនារបស់គេសុទ្ធតែដាក់ថាបន្ថយអំណាចរដ្ឋដើម្បីឲ្យរាស្ត្រមានអំណាច ។មិនដឹងជាការគិតរបស់នាយខ្ញុំខុស ឬ ត្រូវទេតែលើពិភពលោកនេះដូចជាមិនដែលមានប្រទេសណា ឬ អ្នកដឹកនាំប្រតេសណាដែលធ្វើការដោយគ្មានអំណាចនោះទេបើរដ្ឋគ្មានអំណាចទៅធ្វើអ្វីចេញ ។
ចុះបើរាស្ត្រមានអំណាចមួយថ្ងៃៗពួកគាត់គិតតែបបួលគ្នាធ្វើបាតុកម្ម គិតតែពីយកអំណាចរបស់ខ្លួនទៅកាបសង្កត់រដ្ឋាភិបាលតើប្រទេសនោះទៅជាយ៉ាងណា ? សាកមើលបើមិនកើតរឿងអនាធិបតេយ្យពេញស្រុកឥឡូវ ។
បើតាមការគិតរបស់នាយខ្ញុំគេមិនគួរប្រើពាក្យថារាស្ត្រមានអំណាចនោះទេតែគេអាចប្រើពាក្យថារាស្ត្រមានសិទ្ធនោះគ្រប់គ្រាន់ទៅហើយ ។ពាក្យថាមានសិទ្ធមិនមែនមានន័យថាធ្វើអ្វីៗបានស្រេចតែនឹងចិត្តនោះទេគឺធ្វើអ្វីៗដោយគោរពទៅតាមច្បាប់ទម្លាប់របស់ប្រទេសមិនមែនយកសិទ្ធទៅជេរប្រមាទគេ ឬ ទៅរំលោភយកដីគេនោះទេប្រយ័ត្នគេប្រើសិទ្ធតបវិញហ្នា ។
តាមពិតពាក្យខ្មែរមានច្រើនណាស់គេគួរតែចេះជ្រើសរើសពាក្យមកប្រើតើពាក្យណាមានប្រយោជន៍ហើយពាក្យណាដែលគេគិតថាវាផ្ដល់នូវផលប៉ះពាល់ដល់សង្គមនោះ ៕