ចាប់ឪពុកក្មេក ចាក់កូនប្រសា បណ្ដាលឱ្យស្លាប់
ស្ទឹងត្រែង ៖ សមត្ថកិច្ចបានប្រាប់ឲ្យដឹងថា នៅព្រឹកថ្ងៃទី១៧ ខែមីនាថា ករណីឪពុកក្មេកចាក់កូនប្រសា បណ្ដាលឱ្យស្លាប់ចាប់ខ្លួន បានហើយកាលពីថ្ងៃទី ១៦ ខែមីនាឆ្នាំ ២០២១ម្សិលមិញ ក្រោយពីគេចខ្លួនមួយរយៈ ហើយត្រូវកម្មករចៀរជ័រកៅស៊ូប្រទះឃើញ ក៏បានរាយការណ៍ជូនសមត្ថកិច្ច។
លោកដួង ស៊ីវុត្ថា ប្រធានការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តបានប្រាប់ឱ្យដឹងថា ដោយមានការចង្អុលបង្ហាញពីលោកឧត្តមសេនីយ៍ទោ អូត ស៊ីវុត្ថា ស្នងការនគរបាលខេត្ត ស្នងការរងទទួលផែនព្រហ្មទណ្ឌ ក៏បានចាត់កម្លាំងឃាត់ខ្លួនជនសង្ស័យនៅក្នុងចម្ការកៅស៊ូមួយកន្លែង ស្ថិតក្នុងចំណុចអូរឈើទាល ភូមិកាំងដីស សង្កាត់ព្រះបាទ ក្រុងស្ទឹងត្រែង។
ប្រធានការិយាល័យព្រហ្មទណ្ឌខេត្ត បានប្រាប់ទៀតថា ជនសង្ស័យពេលសមត្ថកិច្ចទៅដល់ឃើញមានសភាពមិនសូវស្រួលដោយជនសង្ស័យហាក់បីដូចជា អស់កម្លាំងសង្ស័យថាផឹកថ្នាំពុលដើម្បីសម្លាប់ខ្លួន។
សមត្ថកិច្ចឃើញសភាពដូចនោះ ក៏បានបញ្ជូនមកកាន់មន្ទីរពេទ្យបង្អែកខេត្ត ដើម្បីសង្គ្រោះជីវិត។
នៅព្រឹកថ្ងៃ១៧ខែមីនានេះ ជនសង្ស័យដែលត្រូវជាឪពុកក្មេក ពាក់ព័ន្ធករណីឃាតកម្មចាក់សម្លាប់កូនប្រសាខ្លួនឯងនោះ កំពុងស្ថិតនៅក្នុងមន្ទីរពេទ្យខេត្តស្ទឹងត្រែង មិនទាន់ដឹងខ្លួននៅឡើយទេ។ ក្រុមគ្រូពេទ្យកំពុងតែសង្គ្រោះ។
សមត្ថកិច្ចបានប្រាប់ទៀតថា ជនសង្ស័យឈ្មោះឈន់ មឿន អាយុ៤៩ឆ្នាំ គឺជាកម្មករជ័រកៅស៊ូ នៅចំណុចអូរឈើទាលភូមិកាំងដីសសង្កាត់ព្រះបាទ ក្រុងស្ទឹងត្រែង។
គួររំលឹកផងថា កាលពីវេលាម៉ោងជាង ១១ យប់ថ្ងៃទី ២ ខែមីនាឆ្នាំ ២០២១ ជនសង្ស័យដែលត្រូវជាឪពុកក្មេក បានគេចខ្លួនក្រោយពីចាក់សម្លាប់កូនប្រសា។ ជនរងគ្រោះឈ្មោះចាន់ ឆាយរ៉ាវណ្ណៈ អាយុ៣៦ឆ្នាំ មានស្រុកកំណើតភូមិកាកាប ខណ្ឌដង្កោ រាជធានីភ្នំពេញ។ បានមករកស៊ីយកប្រពន្ធនៅភូមិកាំងដីស សង្កាត់ព្រះបាទក្រុងស្ទឹងត្រែង ខេត្តស្ទឹងត្រែង និងធ្វើជាកម្មករចៀជ័រកៅស៊ូមុនពេលស្លាប់។
ករណីឃាតកម្មខាងលើនេះ កើតឡើងដោយសារតែជម្លោះពាក្យសំដី រវាងកូនប្រសានិងឪពុកក្មេក ក្នុងពេលផឹកស៊ីរហូតឈានដល់ចាក់សម្លាប់តែម្តង៕
