បទល្មើសលួច ឆក់នៅក្នុងរាជធានីភ្នំពេញ ខែមិថុនា កើតមានចំនួន៤២ករណី ឃាត់ខ្លួនជនសង្ស័យ ៦៧នាក់
ភ្នំពេញ ៖ យោងតាមរបាយការណ៍គណៈបញ្ជាការ អនុវត្តផែនការសកម្មភាពបង្ការ ទប់ស្កាត់ និងបង្ក្រាបអំពើលួច ឆក់ នៅរាជធានីភ្នំពេញ ដែលបានគោរពជូនឯកឧត្តម នាយឧត្តមសេនីយ៍សន្តិបណ្ឌិត អគ្គស្នងការនគរបាលជាតិ បានឲ្យដឹងថា គណៈបញ្ជាការបានត្រួតពិនិត្យវាយតម្លៃសភាពការណ៍ បទល្មើសលួច ឆក់ក្នុងរាជធានីភ្នំពេញ ប្រចាំខែមិថុនា ឆ្នាំ២០២១ និងបានដាក់ចេញនូវវិធានការជំនាញសំខាន់ៗមួយចំនួន សម្រាប់ជំរុញដំណើរការ អនុវត្តផែនការសកម្មភាពបន្ត ក្នុងគោលដៅកាត់បន្ថយបទល្មើសលួច ឆក់ផងដែរ ។
របាយការណ៍ឲ្យដឹងថា បទល្មើសជារួមកើតឡើងមានចំនួន ៤២/៥១ករណី ថយ០៩ករណី ស្មើនឹង១៨% ប្រៀបធៀបខែឧសភា ឆ្នាំ២០២១ ក្នុងនោះ ៖ -បទល្មើសលួច មានចំនួន ៣៣/៣៦ករណី ថយ ០៣ករណី -បទល្មើសឆក់ មានចំនួន ០៩/១៥ករណី ថយ ០៦ករណី។
កងកម្លាំងគ្រប់បណ្តាអង្គភាព ដែលមានភារកិច្ចអនុវត្តផែនការ សកម្មភាពបង្ការ ទប់ស្កាត់ និងបង្ក្រាបអំពើលួច ឆក់ បានខិតខំប្រឹងប្រែងសហការគ្នា ចូលរួមបង្ក្រាបបានចំនួនសរុប ៤២ករណី ចាប់បានជនសង្ស័យ ៦៧នាក់ ស្មើ ១០០% នៃបទល្មើសកើតឡើង ក្នុងនោះបទលួច ៣៣/៣៣ករណី និងបទឆក់ ០៩/០៩ករណី ។ ចំពោះជនសង្ស័យ ក្រោយបង្ក្រាប បានរកឃើញធ្លាប់ប្រើសារធាតុញៀន ចំនួន៥៤នាក់ ស្មើនឹង ៨១% ៕
