អ៊ុយក្រែន អះអាងថាមេបញ្ជាការកងទ័ពជើងទឹករុស្ស៉ីតំបន់សមុទ្រខ្មៅ ត្រូវបានសម្លាប់ តែមូស្គូបន្តស្ងៀមស្ងាត់

(កៀវ)៖ កងកម្លាំងពិសេសអ៊ុយក្រែន នៅថ្ងៃចន្ទ​ ទី២៦ ខែកញ្ញា បាននិយាយថាឧត្តមនាវីឯក លោក វ៉ិចទ័រ សូកូឡូវ (Viktor Sokolov) ដែល ជាមេបញ្ជាការកងទ័ពជើងទឹករុស្ស៉ីប្រចាំតំបន់សមុទ្រខ្មៅ ត្រូវបានសម្លាប់នៅក្នុងការវាយប្រហារមួយរបស់អ៊ុយក្រែន កាលពីសប្ដាហ៍មុន លើទីស្នាក់ការកណ្ដាលនៃកងទ័ពជើងទឹករុស្ស៉ី ក្នុងទីក្រុងកំពង់ផែ Sevastopol នៃតំបន់គ្រីមៀ។ នេះបើតាមការចេញផ្សាយដោយទីភ្នាក់ងារ សារព័ត៌មាន AFP។

ក្រសួងការពារជាតិមិនទាន់ធ្វើអត្ថាធិប្បាយអ្វីនោះទេ នៅត្រូវបានសាកសួរថាតើលោក Viktor Sokolov ពិតជាបានស្លាប់ក្នុងការវាយប្រហារលើ តំបន់គ្រីមៀ ពីសំណាក់កងកម្លាំងអ៊ុយក្រែនពិតមែនដែរ ឬក៏យ៉ាងណា? យោធាអ៊ុយក្រែនបានឱ្យដឹងថាការវាយប្រហាររបស់ខ្លួនកាលពីថ្ងៃសុក្រ សប្ដាហ៍មុន គឺមានគោលដៅលើកិច្ចប្រជុំមួយរបស់ថ្នាក់ដឹកនាំកងទ័ពជើងទឹករុស្ស៉ី ក្នុងទីក្រុង Sevastopol។

នៅលើសារមួយបង្ហោះលើបណ្ដាញ Telegram កងកម្លាំងពិសេសអ៊ុយក្រែន បានគូសបញ្ជាក់ដូច្នេះថា «នៅបន្ទាប់ពីការវាយប្រហារដោយមីស៊ីល លើទីស្នាក់ការកណ្ដាលនៃកងទ័ពជើងទឹករុស្ស៉ីប្រចាំតំបន់សមុទ្រខ្មៅ មន្ត្រី៣៤នាក់ត្រូវបានស្លាប់ ក្នុងនោះរួមមានទាំងមេបញ្ជាការកងទ័ពជើងទឹក រុស្ស៉ីប្រចាំតំបន់សមុទ្រខ្មៅម្នាក់។ ចំណែក មនុស្ស ១០៥នាក់ផ្សេងទៀតបានរងរបួស»។

គួរបញ្ជាក់ថា ក្រុមមន្ត្រីលើកបន្តុបដោយរុស្ស៉ី ក្នុងតំបន់គ្រីមៀ បានទទួលស្គាល់ថាពិតជាមានការវាយប្រហាររបស់អ៊ុយក្រែន កាលពីថ្ងៃសុក្រ សប្ដាហ៍មុនប្រាកដមែន ដោយបញ្ជាក់ថាមានមីស៊ីលមួយគ្រាប់ធ្លាក់ចំទីស្នាក់ការកងទ័ពជើងទឹករបស់ខ្លួន។ តែយ៉ាងណាក៏ដោយ គេមិនទាន់អាច ដឹងថាតើកងកម្លាំងពិសេសអ៊ុយក្រែន បានរាប់ចំនួនអ្នកស្លាប់ និងរងរបួសដោយរបៀបណានោះទេ ខណៈភាគីទាំងសងខាងតែងតែអះអាងពី ការខាតបង់ធ្ងន់ធ្ងររបស់សត្រូវ ចាប់តាំងពីសង្រ្គាមផ្ទុះឡើងមក ហើយតែងតែនិយាយថាខ្លួនរងការខាតបង់តិចតួចប៉ុណ្ណោះរៀងៗខ្លួន៕