រុស្ស៊ីវាយប្រហារដោយកាំជ្រួចមីស៊ីល លើភូមិមួយរបស់អ៊ុយក្រែន បានសម្លាប់មនុស្ស ៥១នាក់ ក្នុងអំឡុងពិធីរម្លឹកដល់ទាហានដែលបានស្លាប់
អ៊ុយក្រែន ៖ មន្ត្រីរបស់អ៊ុយក្រែនបាននិយាយថា កាលពីថ្ងៃព្រហស្បតិ៍ ការវាយប្រហារដោយកាំជ្រួចរបស់រុស្ស៊ីទៅលើភូមិមួយនៅភាគឦសាន បានធ្លាក់ចូលទៅក្នុងហាងកាហ្វេ និងហាងលក់គ្រឿងទេសដោយបានសម្លាប់មនុស្ស ៥១ នាក់ ក្នុងអំឡុងពេលប្រមូលផ្តុំគ្នាដើម្បីកាន់ទុក្ខ ទាហានអ៊ុយក្រែនដែលបានស្លាប់។
ប្រធានាធិបតីអ៊ុយក្រែន លោក Volodymyr Zelenskiy បាននិយាយថា ឧបទ្ទវហេតុនេះគឺជា ការវាយប្រហារ ដោយចេតនាលើជនស៊ីវិល និង”មិនមែនជាការវាយប្រហារដោយគ្មានគោលដៅទេ”។
មានគំនរឥដ្ឋធំៗ ដែកដែលបាក់បែក និងកម្ទេចកម្ទីរនៅកន្លែងដែលធា្លប់ជាហាងកាហ្វេ និងហាងដែល ត្រូវបានវាយលុកនៅពេលរសៀលនៅក្នុងភូមិ Hroza ក្នុងតំបន់ Kharkiv ។
មន្ត្រីក្នុងតំបន់បានប្រាប់ទូរទស្សន៍សាធារណៈ Suspilne ថា ការវាយប្រហារនេះគឺជា ការវាយប្រហារដ៏ សាហាវបំផុតនៅក្នុងតំបន់ Kharkiv ចាប់តាំងពីការឈ្លានពានរបស់រុស្ស៊ីកាលពីជាង ១៩ខែមុនមក។
ហើយក៏ហាក់ជាមានជនស៊ីវិលស្លាប់ច្រើនបំផុតមួយនៅក្នុងការវាយប្រហាររបស់រុស្ស៊ី។
នគរបាលក្នុងតំបន់បានប្រាប់ទូរទស្សន៍ជាតិថា ចំនួនអ្នកស្លាប់មានចំនួន ៥១នាក់ ក្នុងនោះ ៦នាក់ រងរបួស និង៣នាក់ បាត់ខ្លួន។ ពួកគេមួយចំនួនជាអ្នកកាន់ទុក្ខដែលប្រមូលផ្តុំគ្នានៅក្នុងហាងកាហ្វេមានទាហានម្នាក់ ស្លាប់៕