មេតុងទីនម្នាក់ស៊ីដាច់លុយសមាជិកជាង៤០ម៉ឺនដុល្លារ ត្រូវនាំខ្លួនមកសាកសួរនៅតុលាការ
ភ្នំពេញ ៖ នៅព្រឹកថ្ងៃទី២៧ តុលា នេះ តំណាងអយ្យការបានសាកសួរស្ត្រីសង្ស័យម្នាក់ ជាមន្ត្រីសាលាខណ្ឌ និង ជាមេតុងទីន រួចហើយ ហើយបានបញ្ជូនខ្លួនផ្ញើទៅសមត្ថកិច្ចវិញ និង រង់ចាំការសម្រេចចុងក្រោយ ។ ស្ត្រីមេតុងទីនឈ្មោះ ចាន់ ស៊ីនួន ស៊ីដាច់លុយ សមាជិកក្រុមជាច្រើននាក់ទៀត ដែលមានទឹកប្រាក់រហូតដល់ជាង៤០ម៉ឺនដុល្លារអាមេរិក។
ឥឡូវនេះ សមាជិកជាកូនតុងទីនទាំងអស់នោះ កំពុងតាមដាក់ពាក្យ បណ្តឹងជាបន្តបន្ទាប់ ដូច្នោះ វាសនាមេតុងទីន ចាន់ ស៊ីនួន ប្រហែលមិនអាចគេចផុតពីការឃុំខ្លួនបណ្តោះអាសន្ននោះឡើយ ។
សូមបញ្ជាក់ថា ស្ត្រីម្នាក់បម្រើការងារជាមន្ត្រីសាលាខណ្ឌ និងប្រកបមុខរបរក្រៅ ដោយជាមេតុងទីនផង ត្រូវបានកម្លាំងសមត្តកិច្ចនគរបាលការិយាល័យអនុវត្តដីកានៃ នាយកដ្ឋាននគរបាលព្រហ្មទណ្ឌក្រសួងមហាផ្ទៃឃាត់ខ្លួន បញ្ជូនទៅកាន់សាលាដំបូងរាជធានីភ្នំពេញ កាលពីព្រឹកថ្ងៃទី១៧ តុលា ពាក់ព័ន្ធលើបណ្តឹង.ឆបោក និងរំលោភទំនុកចិត្ត មានទឹកប្រាក់ ២១៥០០ដុល្លារអាមេរិក ។ ស្ត្រីជាប់សង្ស័យខាងលើ ឈ្មោះ ចាន់ ស៊ីនួន អាយុ៣៤ឆ្នាំ ស្នាក់ផ្ទះលេខ១៧ អឺ ផ្លូវ៣៧១ សង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ ។ តាមមន្ត្រីនគរបាលព្រហ្មទណ្ឌបានឲ្យដឹងថា ការឃាត់ខ្លួនស្ត្រីមេតុងទីនម្នាក់នោះ គឺធ្វើឡើងតាមពាក្យបណ្តឹងរបស់ឈ្មោះ ប៊ុន សុភាព ។
ពាក្យបណ្តឹងបានបញ្ជាក់ថា កាលអំឡុងខែមីនា ឆ្នាំ២០១៧ ជនជាប់សង្ស័យ បានធ្វើមេតុងទី ដែលមានសមាជិកប្រមាណ៣៨៥នាក់ លេង ១ក្បាលចាប់ពី១០ដុល្លារ, ៣០ដុល្លារ, ៥០ដុល្លារ រហូតដល់១០០ដុល្លារអាមេរិក ។ ក្រោយមក កូនតុងបានដេញយកប្រាក់នោះជាបន្តបន្ទាប់ ខ្លះបាន ខ្លះមិនបាន ជាក់ស្តែងដូចជាដើមបណ្តឹងឈ្មោះ ប៊ុន សុភាព ដេញបានតែលើក្រដាស លុយអត់បាន១រៀលទេ ហើយមេតុងទីនបានសន្យាប្រគល់ឲ្យថ្ងៃនេះថ្ងៃនោះ ប៉ុន្តែទីបំផុតគេចខ្លួនបាត់ សូម្បីការទំនាក់ទំនង ក៏ស្ងាត់សូន្យឈឹង ។
ក្នុងរយៈពេលមេតុងតុងទីន បាននិងកំពុងគេចខ្លួន ដើមបណ្តឹងកើតទុកមិនសុខចិត្ត ក៏បានដាក់ពាក្យបណ្តឹងទៅសមត្តកិច្ច ដើម្បីឲ្យជួយចាត់ការតាមផ្លូវច្បាប់ ។ លុះថ្ងៃទី២៤ តុលា ស្រាប់តែលេចមុខជនសង្ស័យជាមេតុងទីន សមត្ថកិច្ចក៏បានអនុញ្ញាតឱ្យបើការស៊ើបអង្កេតបឋមពីលោក ហ៊ឹង ប៊ុនថន ព្រះរាជអាជ្ញារងអមសាលាដំបូងរាជធានីភ្នំពេញ ឃាត់ខ្លួនឈ្មោះ ចាន់ ស៊ីនួន ដើម្បីនាំទៅសាកសួរ ៕