ប្លន់ម៉ូតូបានហើយរត់មិនរួចត្រូវប៉ូលិសចាប់ខ្លួន
ភ្នំពេញៈជនសង្ស័យ២នាក់ក្នុងចំណោមបក្ខពួកជាច្រើននាក់ ត្រូវបានកម្លាំងសមត្ថកិច្ចប៉ុស្ដិ៍ទំនប់ទឹកដេញចាប់បាន និងដកហូតបានម៉ូតូ២គ្រឿង។ក្រោយពីពួកគេធ្វើសកម្មភាពវាយប្លន់ម៉ូតូឡេត ពីយុវជន២នាក់បានសម្រេច។ករណីនេះបានកើតឡើងនៅតាមបណ្ដោយផ្លូវ២៧១ ក្នុងសង្កាត់ទំនប់ទឹក ខណ្ឌចំការមនកាលពីរំលងអធ្រាត្រចូលថ្ងៃទី២៧ ខែតុលា ឆ្នាំ២០១៨។
ជនសង្ស័យ២នាក់ដែលឃាត់ខ្លួនបានជាប់ពាក់ព័ន្ធករណី វាយប្លន់ម៉ូតូមានឈ្មោះ ទី១ ប៉េង រស្មី ភេទប្រុស អាយុ២៥ឆ្នាំនិងទី២ឈ្មោះទុនភារក្សភេទប្រុសអាយុ១៨ឆ្នាំព្រមទាំងដកហូតម៉ូតូ២គ្រឿងមកវិញ រួមទាំងរបស់ជនរងគ្រោះ និងរបស់ជនសង្ស័យ។
ម៉ូតូម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខភ្នំពេញ 1DO-6225 ជាររបស់ជនសង្ស័យ មួយទៀតម៉ាក SUZUKI ឡេត ពណ៌ស លាយខៀវ ពាក់ស្លាកលេខ កំពង់ស្ពឺ1L3119ជារបស់ជនរងគ្រោះ ឈ្មោះកាន់ចានីអាយុ២៤ឆ្នាំមុខរបបសំណង់ស្នាក់នៅក្នុង សង្កាត់និរោធខណ្ឌច្បារអំពៅ រាជធានីភ្នំពេញ ។
ជនសង្ស័យទាំង២នាក់ រួមទាំងវត្ថុតាងកំពុងឃាត់ នៅប៉ុស្ដិ៍នគរបាលទំនប់ទឹក ដើម្បីកសាងសំណុំរឿង បញ្ចូនបន្តទៅអធិការដ្ឋាន នគរបាលខណ្ឌចំការមន ចាត់ការបន្តតាមច្បាប់៕