រដ្ឋមន្ត្រីក្រសួងព័ត៌មាន៖កិច្ចប្រជុំកំពូលប្រព័ន្ធផ្សព្វផ្សាយអាស៊ីលើកទី២០លើទឹកដីកម្ពុជាដើម្បីរួមគ្នាប្រឆាំងព័ត៌មានក្លែងក្លាយក្នុងដំណាក់កាលបញ្ញាសិប្បនិម្មិត (AI) ដែលជះឥទ្ធិពលជំនឿទុកចិត្តពលរដ្ឋមកលើប្រព័ន្ធផ្សព្វផ្សាយ

សៀមរាប៖ឯកឧត្ដម នេត្រ ភក្ត្រា រដ្ឋមន្ត្រីក្រសួងព័ត៌មាន នៅរសៀលថ្ងៃទី២១ ខែកក្កដា ឆ្នាំ២០២៥នេះ បានផ្តល់បទសម្ភាសន៍ពីដំណើរ និងប្រធានបទសំខាន់ៗ នៃកិច្ចប្រជុំកំពូលប្រព័ន្ធផ្សព្វផ្សាយអាស៊ីលើកទី២០ (The 20th AMS 2025) នៅលើទឹកដីសៀមរាប-អង្គរ ពីការងារប្រឆាំងព័ត៌មានក្លែងក្លាយ នៅក្នុងដំណាក់កាលការរីកចម្រើនផ្នែកបញ្ញាសិប្បនិម្មិត (AI) ដែលបានជះឥទ្ធិពលនៃជំនឿទុកចិត្តរបស់ប្រជាពលរដ្ឋមកលើប្រព័ន្ធផ្សព្វផ្សាយ។ នៅឆ្នាំ២០២៥ គឺជាលើកទីពីរ ដែល កម្ពុជាធ្វើ ជា ម្ចាស់ ផ្ទះ រៀបចំ កិច្ចប្រជុំ កំពូលប្រព័ន្ធផ្សព្វផ្សាយអាស៊ី។

នាឱកាសនោះដែរ ឯកឧត្ដមរដ្ឋមន្ត្រីក្រសួងព័ត៌មាន បានបញ្ជាក់ថា ក្នុងឱកាសដែលព្រះរាជាណាចក្រកម្ពុជា ធ្វើជាម្ចាស់ផ្ទះនៃកិច្ចប្រជុំកំពូលប្រព័ន្ធផ្សព្វផ្សាយអាស៊ីលើកទី២០នេះ នឹងចែករំលែកពីបទពិសោធន៍ដែលកម្ពុជា បានរៀបចំយន្តការនៃការប្រយុទ្ធប្រឆាំងព័ត៌មានក្លែង ក៏ដូចជាការតាមដាន ក្តាប់ព័ត៌មានក្លែងក្លាយ ដែលបានកើតឡើងនៅក្នុងប្រទេសកម្ពុជា លើបណ្តាញសង្គមនានាជាដើម។

ចំពោះការប្រយុទ្ធប្រឆាំងព័ត៌មានក្លែងក្លាយ, ត្រូវបានឯកឧត្ដមរដ្ឋមន្ត្រី នេត្រ ភក្ត្រា បានបញ្ជាក់ថា រាជរដ្ឋាភិបាលកម្ពុជា ដែលមានក្រសួងព័ត៌មាន ជាសេនាធិការ គឺមិនព្រងើយកន្តើយអនុញ្ញាតឱ្យព័ត៌មានក្លែងក្លាយដឹកមុខនោះទេ។ ដូច្នេះ កាលណាមានព័ត៌មានក្លែងក្លាយ ត្រូវបានប្រឌិត និងផ្សព្វផ្សាយឡើង គឺយើងប្រើប្រាស់ព័ត៌មានពិត ច្បាស់លាស់ ដោយបានបកស្រាយ ផ្សព្វផ្សាយជូនសារធារណជនឱ្យបានលឿន និងបានដឹងច្បាស់ពីរឿងពិតផងដែរ។

ឯកឧត្ដមរដ្ឋមន្ត្រី នេត្រ ភក្ត្រា បានបន្ថែមថា នៅឆ្នាំ២០២៥នេះ ក្នុងនាមម្ចាស់ផ្ទះនៃកិច្ចប្រជុំកំពូលប្រព័ន្ធផ្សព្វផ្សាយអាស៉ីលើកទី២០នេះ កម្ពុជានឹងរៀបចំឱ្យមានសេចក្តីថ្លែងការណ៍អង្គរទី២ ពាក់ព័ន្ធនឹងការប្រឆាំងព័ត៌មានក្លែងក្លាយ ពីព្រោះបច្ចុប្បន្ននេះ បញ្ហារីករាលផ្នែកបញ្ញាសិប្បនិម្មិត មានជ្រែកចូលក្នុងវិស័យព័ត៌មាន។ ហើយនៅពេលខ្លះក្រុមជនខិលខូចបានប្រើប្រាស់សំឡេងសិប្បនិម្មិត ដើម្បីបំភ្លៃព័ត៌មានខុសពីការពិត បង្កើតឱ្យមានការភាន់ច្រឡំពីសំណាក់មហាជន បញ្ហានេះយើងត្រូវយកចិត្តទុកដាក់ ខ្ពស់ក្នុង ការប្រើប្រាស់ ប្រព័ន្ធបច្ចេកវិទ្យា។

ឯកឧត្ដមរដ្ឋមន្ត្រី នេត្រ ភក្ត្រា បានបញ្ជាក់ថា តាមបទពិសោធន៍ កន្លងមក ឃើញថាមានតែកម្ពុជាទេដែលបានរៀបចំនូវយន្តការក៏ដូចជា៖ យុទ្ធនាការច្បាស់លាស់ ចេញជារូបរាង និងទ្រង់ទ្រាយធំ ដើម្បីផ្លាស់ប្តូរឥរិយាបថប្រជាពលរដ្ឋ ក្នុងការប្រយុទ្ធប្រឆាំងព័ត៌មានក្លែងក្លាយ។ ក្រៅពីនេះយើងក៏សិក្សាទៅលើផ្នែកឯកសារ និងការរៀបចំគិតគូរផ្សេងៗរបស់បណ្តាប្រទេសមួយចំនួន តែមិនទាន់មានសកម្មភាព ជាក់ស្តែងនៅឡើយទេ។

ឯកឧត្ដមរដ្ឋមន្រ្តី នេត្រ ភក្រ្តា បានបន្តថា អ្វីដែលយើងរំពឹងទុកបណ្តាប្រទេស ក្នុងតំបន់អាស៊ាន និងពិសេសក្នុងតំបន់អាស៊ីតែម្តងកាន់តែរួបរួមគ្នា ថែមទៀតក្នុងកិច្ច សហប្រតិបត្តិការក្នុងវិស័យព័ត៌មាន និងសោតទស្សន៍ក្នុងតំបន់។ ត្រូវតែមានការចែករំលែករបស់ប្រទេសនីមួយៗក្នុងតំបន់ និងចែករំលែកដល់ប្រទេសផ្សេងៗ ទៀតបាន យកទៅអនុវត្ត ឬទាញយកទៅជាបទពិសោធន៍សម្រាប់ការអនុវត្តក្នុង កិច្ចការងាររបស់ខ្លួន។ ដោយឡែកចំពោះការទូតព័ត៌មាន ដែលក្រសួងព័ត៌មានកម្ពុជាបង្កើតឡើង គឺដើម្បីឱ្យបណ្តាប្រទេសនីមួយៗមានការយកចិត្តទុកដាក់ ហើយរួបរួមគ្នាក្នុងការរៀបចំនូវគោលនយោបាយ គំនិតផ្តួចផ្តើមគម្រោង និងការអនុវត្តផ្សេងៗដែលបម្រើឱ្យតំបន់ បម្រើឱ្យទ្វីបក្នុងអាស៊ី តែម្តងដែលធ្វើឱ្យបណ្តាប្រទេសនីមួយៗកាន់តែជិតស្និទ្ធឈានទៅដល់ការដោះស្រាយរួមគ្នា។

សូមជម្រាបថា ប្រទេសកម្ពុជាធ្វើជាម្ចាស់ផ្ទះរៀបចំសន្និសីទកំពូលប្រព័ន្ធផ្សព្វផ្សាយអាស៊ីលើកទី២០ (20th Asia Media Summit -AMS) នៅលើទឹកដីអង្គរ ខេត្តសៀមរាប ក្រោមប្រធានបទ «អបអរសាទរពីរទសវត្សរ៍នៃឧត្តមភាព និងលើសពីនេះ» ដែលមានអ្នកសារព័ត៌មានចូលរួមមកពីប្រទេសជាសមាជិកចំនួន ២៦ប្រទេស នៅទូទាំងពិភពលោក និងដៃគូកិច្ចសហប្រតិបត្តិការ ព្រមទាំងអង្គការអន្តរជាតិដែលចូលរួមជាមួយប្រព័ន្ធផ្សព្វផ្សាយផងដែរ៕