សម្តេចតេជោហ៊ុនសែន៖ម៉ោងប្រមាណ៤ទៀបភ្លឺ ខ្ញុំនិងសហការី,ឯនាយករដ្ឋមន្ត្រីហ៊ុនម៉ាណែតនិងក្រុមការងារកំពុងបំពេញការងារយ៉ាងសកម្មតាមដានជាប្រចាំអំពីស្ថានការនៅព្រំដែន ជាមួយកងទ័ពជួរមុខ

ភ្នំពេញ៖សម្តេចតេជោ ហ៊ុន សែន ប្រធានព្រឹទ្ធសភាកម្ពុជា នៅម៉ោងប្រមាណ៤ទៀបភ្លឺ ថ្ងៃទី៤ ខែសីហា ឆ្នាំ២០២៥នេះ បានបង្ហោះសារបង្ហាញអំពីការតាមដានជាប្រចាំអំពីស្ថានការនៅព្រំដែន ជាមួយកងទ័ព។ 

បន្ថែមពីនេះ សម្តេចក៏បានបញ្ជាក់ឱ្យដឹងផងដែរថា សម្តេចនាយករដ្ឋមន្ត្រី ហ៊ុន ម៉ាណែត និងក្រុមកាងារកំពុងបំពេញការងារយ៉ាងសកម្ម ឈានទៅពឹងពាក់កាកបាទក្រហមអន្តរជាតិដើម្បីជួយដល់ទាហានកម្ពុជា ១៨រូប ដែលថៃចាប់ក្រោយបទឈប់បាញ់ និងមិនទាន់បញ្ជូនមកកម្ពុជាវិញ។ 

ក្នុងសំណេររបស់សម្តេចតេជោ ហ៊ុន សែន តាមបណ្ដាញសង្គមផ្លូវការថ្ងៃនេះមានខ្លឹមសារទាំងស្រុងដូច្នេះថា៖

បងប្អូនលង់លក់អស់ទៅហើយ នៅឡើយតែខ្ញុំ និងសហការីមួយចំនួន នៅជាមួយខ្ញុំនៅមុខប្រព័ន្ធវីដេអូ ដែលមានសម្តេច ទៀ បាញ់ និងមេបញ្ជាការកងទ័ពជើងគោក ម៉ៅ សុផាន់ ក្រោយពេលឯកឧត្តមអគ្គបញ្ជាការ វង្ស ពិសេន ចាកចេញដើម្បីត្រៀមចេញទៅប្រជុំនៅម៉ាឡេស៉ីព្រឹកស្អែក។

ដោយឡែកនៅទីបញ្ជាការមួយទៀតមាននាយករដ្ឋមន្ត្រី ហ៊ុន ម៉ាណែត និងក្រុមការងារកំពុងបំពេញការងារយ៉ាងសកម្ម ដែលយើងនឹងឈានទៅរកការពឹងពាក់ លើកាកបាទក្រហមអន្តរជាតិ ដើម្បីជួយដល់ទាហានកម្ពុជា១៨រូប ដែលថៃចាប់ក្រោយបទឈប់បាញ់ និងមិនទាន់បញ្ជូនមកឲ្យកម្ពុជាវិញ។

យប់នេះខ្ញុំនិងភរិយា ក៏បានទាក់ទងទៅបណ្តាមេបញ្ជាការនៅជួរមុខមួយចំនួនផងដែរ ដែលពួកគាត់កំពុងគោរពយ៉ាងម៉ឺងម៉ាត់នៃបទឈប់បាញ់ និងប្រុងប្រយ័ត្នខ្ពស់ សម្រាប់ករណីមានការរំលោភលើបទឈប់បាញ់ពីភាគីម្ខាងទៀត។

ថ្ងៃមុន Starbucksស្ករ ១០០% ថ្ងៃនេះ Starbucksស្ករ ៣០ % និងឈានទៅសម្រេចគោលដៅ Starbucks ស្ករ ០% ដើម្បីបង្ការជំងឺទឹកនោមផ្អែម៕