លោកដូណាល់ត្រាំនឹងប្ដូរឈ្មោះក្រសួងការពារជាតិអាមេរិកទៅជាក្រសួងសង្រ្គាម

វ៉ាស៊ីនតោន៖មន្ត្រីសេតវិមានម្នាក់កាលពីថ្ងៃទី៤ ខែកញ្ញា បាននិយាយថាប្រធានាធិបតីអាមេរិក លោក ដូណាល់ ត្រាំ គ្រោងនឹងចុះហត្ថលេខាលើបទបញ្ជាប្រតិបត្តិមួយ នៅថ្ងៃសុក្រ ទី៥ ខែកញ្ញាដើម្បីប្ដូរឈ្មោះក្រសួងការពារជាតិអាមេរិក ទៅជាក្រសួងសង្រ្គាម។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។ 

បទបញ្ជាប្រតិបត្តិខាងលើ នឹងតម្រូវឱ្យរដ្ឋមន្ត្រីការពារជាតិអាមេរិក លោក Pete Hegseth ក្រសួងការពារជាតិអាមេរិក និងមន្ត្រីនៅក្រោមចំណុះក្រសួងការពារជាតិប្ដូរតួនាទីទៅជា រដ្ឋមន្ត្រីសង្រ្គាម ក្រសួងសង្រ្គាម និងអនុរដ្ឋមន្ត្រីសង្រ្គាម។ 

គួរបញ្ជាក់ថា ចាប់តាំងពីឡើងកាន់តំណែងជាប្រធានាធិបតីអាមេរិក កាលពីខែមករាមក លោក ត្រាំ បានចេញបទបញ្ជាប្រតិបត្តិមួយចំនួនដើម្បីប្ដូរឈ្មោះស្ថាប័ន និងទីតាំង ក្នុងនោះ លោកបានប្ដូរឈ្មោះឈូងសមុទ្រម៉ិកស៉ិក ទៅជាឈូងសមុទ្រអាមេរិកជាដើម។ ក្រសួងការពារជាតិអាមេរិកក៏ធ្លាប់ប្រើឈ្មោះជាក្រសួងសង្រ្គាមផងដែរអំឡុងសង្រ្គាមលោកលើកទី២៕