អ៉ីរ៉ង់បាញ់មីស៉ីលលើអ៉ីស្រាអែលជាលើកដំបូងបន្ទាប់ពីមានបទឈប់បាញ់

តេហេរ៉ង៖អ៉ីរ៉ង់ បានបាញ់មីស៉ីលទៅកាន់គោលដៅនៅអ៉ីស្រាអែល ជាការសងសឹកចំពោះការវាយប្រហាររបស់អ៉ីស្រាអែលលើទីក្រុងបេរូត ប្រទេសលីបង់ កាលពីថ្ងៃអាទិត្យចុងសប្តាហ៍កន្លងទៅនេះ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃចន្ទ ទី៨ ខែមិថុនា ឆ្នាំ២០២៦។ 

អ៉ីរ៉ង់ បាននិយាយជាយូរមកហើយ ថាកិច្ចព្រមព្រៀងសន្តិភាពជាមួយសហរដ្ឋអាមេរិក គឺផ្អែកលើបទឈប់បាញ់ដែលរួមបញ្ចូលទាំងនៅលីបង់។ ប៉ុន្តែកាលពីថ្ងៃអាទិត្យ អ៉ីស្រាអែលបានបើកការវាយប្រហារជាយក្រុងបេរូត ជាលើកដំបូងចាប់តាំងពីសហរដ្ឋអាមេរិក ប្រកាសផែនការបទឈប់បាញ់សម្រាប់លីបង់ នៅសប្តាហ៍មុន។ 

ឆ្មាំបដិវត្តន៍អ៉ីរ៉ង់និយាយថា ពួកគេបានកំណត់គោលដៅលើមូលដ្ឋានទ័ពអាកាស Ramat David នៅជិតទីក្រុង Nazareth របស់អ៉ីស្រាអែល។ យោធាអ៉ីស្រាអែលនិយាយថា ប្រព័ន្ធការពារដែនអាកាសរបស់ខ្លួនបាញ់ស្ទាក់មីស៉ីលនោះ។ 

គួរបញ្ជាក់ថា ការប្រយុទ្ធគ្នារវាងអ៉ីស្រាអែល ជាមួយក្រុមហេសបូឡាគាំទ្រដោយអ៉ីរ៉ង់ បានផ្ទុះឡេីងវិញកាលពីខែមីនា ពោលគឺបន្ទាប់ពីសហរដ្ឋអាមេរិក និងអ៉ីស្រាអែលបើកការវាយប្រហារលើអ៉ីរ៉ង់៕