យ៉ាងហោចណាស់ ៦០នាក់បានស្លាប់ គ្រោះទឹកជំនន់ បំណាក់ដី និងខ្យល់កួច នៅភាគកណ្តាលឥណ្ឌូណេស៊ី
គ្រោះទឹកជំនន់ បំណាក់ដី និងខ្យល់កួច នៅតាមតំបន់ភាគកណ្តាល ស្រុក Gowa នៃប្រទេសឥណ្ឌូណេស៊ីបានធ្វើឲ្យមនុស្សយ៉ាងហោចណាស់ ៦០នាក់បានស្លាប់ ខណៈដែលកងកម្លាំងសមត្ថកិច្ចចម្រុះ រួមជាមួយអាជ្ញាធរ កំពុងបើកប្រតិបត្តិរុករកមនុស្សដែលបាត់ខ្លួន និងជម្លៀសពលរដ្ឋមួយចំនួនទៀត ទៅរកកន្លែងមានសុវត្ថិភាព ។ នេះបើតាមការដកស្រង់ការផ្សាយចេញពីទីភ្នាក់ងារព័ត៌មានចិន ស៊ីនហួរ នៅយប់ថ្ងៃសុក្រ ទី២៥ ខែមិថុនា ឆ្នាំ២០១៩។
ភ្លៀងបានធ្លាក់ជោកជាំបានបង្កឲ្យទំនប់ទឹកមួយកន្លែងជន់លិចស្រុកចំនួន១៣ នៃខេត្តស៊ូឡាវេស៊ីខាងត្បូងកាលពីថ្ងៃអង្គារសប្តាហ៍នេះ បង្កឲ្យមនុស្សសរុបចំនួន២៥នាក់ បាត់ខ្លួន និងប្រមាណជា៤៧នាក់បានរងរបួស ។ ជាមួយគ្នានេះគ្រោះបំណាក់ដីនិងខ្យល់កួច ក៏បានបង្ខំឲ្យមនុស្ស៣.៤៨១នាក់ជម្លៀសខ្លួនចេញពីលំនៅឋាន ដើម្បីជ្រកកោននៅទីសុវត្ថិភាពផងដែរ បន្ទាប់ពីផ្ទះសម្បែង៧៩ខ្នង ស្ពាន១០ខ្សែ សាលារៀន២២ខ្នង និងអគាររដ្ឋាភិបាលចំនួន០៦ ត្រូវបានបំផ្លិចបំផ្លាញ។
តំបន់ដែលរងការវាយលុកពីគ្រោះធម្មជាតិធ្ងន់ធ្ងរជាងគេ គឺស្រុក Gowa ដែលគេរកឃើញសាកសពមនុស្សច្រើនជាងគេរហូតដល់៤៤នាក់៕
