ឃាតករមិនស្គាល់មុខ ចាក់សម្លាប់បុរសម្នាក់ ក្នុងផ្ទះសំណាក់ ចន្ធូត្រជាក់ចិត្ត ប្លន់យកម៉ូតូមួយគ្រឿង
ភ្នំពេញៈ បុរសម្នាក់ ត្រូវបានគេចាក់សម្លាប់នៅក្នុងផ្ទះសំណាក់ ចន្ធូត្រជាក់ចិត្ត ។ ចំណែកឃាតករដែលមិនស្គាល់អត្តសញ្ញាណ បានចាក់សម្លាប់ជនរងគ្រោះ ហើយជិះម៉ូតូរបស់ជនរងគ្រោះចេញទៅបាត់ កាលនៅវេលាម៉ោង៧៖៣០នាទីយប់ ថ្ងៃអាទិត្យ ទី២៧ ខែមករា ឆ្នាំ២០១៩ នៅផ្ទះលេខ២១៥B នៅតាមបណ្ដោយផ្លូវ៣១MC ក្រុម៥ ភូមិឫស្សី២ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។
ជនរងគ្រោះ ឈ្មោះ យ៉ាន់ ជឿន អាយុ៣៧ឆ្នាំ ជនជាតិខ្មែរ មុខរបររត់ម៉ូតូឌុប ស្នាក់នៅបន្ទប់ផ្ទះជួលម្ដុំស្ទឹងមានជ័យ ខណ្ឌមានជ័យ មានស្រុកកំណើតនៅឯ ភូមិព្រែកសំបួរ ឃុំអង្គរបុរី ស្រុកអង្គរបុរី ខេត្តតាកែវ។ សម្ភារៈដែលបាត់បង់ រួមមាន ម៉ូតូមួយគ្រឿង ចិញ្ចៀនមួយវង់ និងកាបូបលុយ។ ជនរងគ្រោះ គឺជាអ្នករត់ម៉ូតូឌុបនៅខេត្តតាកែវ ដោយយូរៗឡើងមកភ្នំពេញម្តង យកអីវ៉ាន់ដាក់ឲ្យម៉ូយ។ លុះដល់ថ្ងែកើតហេតុ ទាំងបងប្អូន និងប្រពន្ធកូន មិនឃើញជនរងគ្រោះ វិលត្រឡប់ទៅផ្ទះវិញ ស្រាប់តែមានសមត្ថកិច្ច ទូរស័ព្ទមកប្រាប់សាច់ញាតិថា ជនរងគ្រោះ ត្រូវបានគេចាក់សម្លាប់នៅក្នុងផ្ទះសំណាក់ “ចន្ធូ ត្រជាក់ចិត្ត”ស្លាប់បាត់ទៅហើយ។
ម្ចាស់ផ្ទះសំណាក់ បានឲ្យដឹងថា នៅវេលាម៉ោងជិត៥ល្ងាច ជនរងគ្រោះ បានជិះម៉ូតូម៉ាក ហុងដា ឌ្រីមសង់ (Honda Dream) ស៊េរីឆ្នាំ២០១៦ ពណ៌ខ្មៅ ពាក់ស្លាកលេខភ្នំពេញ 1FL-9986 មួយគ្រឿង ឌុបគ្នា មកជួលបន្ទប់ស្នាក់នៅផ្ទះសំណាក់ ជាមួយបុរសម្នាក់ទៀត ។ មួយសន្ទុះក្រោយមកបុរសមិនស្គាល់អត្តសញ្ញាណម្នាក់ បានចេញពីបន្ទប់ចុះមកក្រោមមុន ហើយម្ចាស់ផ្ទះសំណាក់ ក៏បានសួរនាំដែរ តែបុរសនោះបានឆ្លើយថា ចេញទៅយកមិត្តស្រីមកគេងជាមួយគ្នា ហើយក៏ជិះចេញទៅបាត់តែម្ដង។ បន្ទាប់ពីទៅបាត់យូរពេក មកដល់ម៉ោង៧យប់ ម្ចាស់ផ្ទះសំណាក់ ក៏បានឡើងទៅមើល ក៏ប្រទះឃើញបុរសរងគ្រោះដេកស្លាប់ នៅក្នុងបង្គន់ បន្ទប់ជាន់ទី៣ ដោយមានស្នាមចាក់ជាច្រើនកាំបិត និងមានកាំបិតចិតបន្លែមួយ នៅក្បែរសព ។ ម្ចាស់ផ្ទះសំណាក់ បានរាយការណ៍ប្រាប់សមត្ថកិច្ចប៉ុស្តិ៍នគរបាលស្ទឹងមានជ័យទី៣ ឲ្យចុះមកពិនិត្យនិងស្រាវជ្រាវ ចាប់ជនដៃដល់។
សមត្ថកិច្ចបានធ្វើការសន្និដ្ឋានថា ករណីនេះ ជាឃាតកម្មប្លន់សម្លាប់យកម៉ូតូ ៕
