រដ្ឋបាលរាជធានីភ្នំពេញនិងទីក្រុងឡុងប៊ិចសម្រចចងសម្ព័ន្ធមេត្រីភាពនឹងគ្នា ខណៈទំហំពាណិជ្ជកម្មរកម្ពុជានិង សហរដ្ឋអាមេរិកកើនឡើងពីជាង៣០០០លានដុល្លារអាមេរិកនៅឆ្នាំ២០១៦និងជិត៤ពាន់លានដុល្លារនៅឆ្នាំ២០១៨
ភ្នំពេញ៖ រដ្ឋបាលរាជធានីភ្នំពេញនិងទីក្រុងឡុងប៊ិច បានសម្រចចងសម្ព័ន្ធមេត្រីភាពជាមួយគ្នាហើយខណៈទំហំពាណិជ្ជកម្មកម្ពុជានិង សហរដ្ឋអាមេរិកបានកើនឡើងពីជាង៣០០០លានដុល្លារអាមេរិកនៅឆ្នាំ២០១៦និងកើនឡើងជិត៤ពាន់លានដុល្លារនៅឆ្នាំ២០១៨ ។
នេះបើតាមការបញ្ជាក់អោយដឹងពីលោក ឃួង សេ្រងអភិបាលរាជធានីភ្នំពេញ កាលពីព្រឹកថ្ងៃទី២៨ មករា២០១៩ក្នុងឱកាសដែលលោកអនុញ្ញាតអោយលោកបណ្ឌិត រ៉ូប៊ើត ហ្គាសៀ អភិបាលក្រុងឡុងប៊ិច នៃរដ្ឋកាលីហ្វរញ៉ា សហរដ្ឋអាមេរិក ចូលជួបសម្តែងការគួរសម ពិភាក្សាការងារ និងចុះហត្ថលេខាចងសម្ព័ន្ធមេត្រីភាពនឹងគ្នា ស្របពេលដែលប្រតិភូនេះបាននឹងកំពុងបំពេញទស្សនៈកិច្ចផ្លូវការនៅព្រះរាជាណាចក្រកម្ពុជា ចាប់ពីថ្ងៃទី ២៦ រហូតដល់ថ្ងៃទី៣០ ខែមករា ឆ្នាំ២០១៩នេះ។
លោក ឃួង សេ្រង បានអោយដឹងទៀតថា ព្រះរាជាណាចក្រកម្ពុជា និងសហរដ្ឋអាមេរិក បានបង្កើតទំនាក់ទំនងការទូតទ្វេភាគីជាមួយគ្នាចាប់តាំងពីឆ្នាំ១៩៥០មកម្ល៉េះ រហូតមកដល់ពេលនេះ ទំហំពាណិជ្ជកម្មទ្វេភាគីរវាងប្រទេសទាំងពីរ មានអត្រាកំណើនគួរអោយកត់សម្គាល់ ក្នុងនោះទំហំពាណិជ្ជកម្មរវាងកម្ពុជា និងសហរដ្ឋអាមេរិក បានកើនឡើងពី ៣,១៧៣លានដុល្លាអាមេរិក ក្នុងឆ្នាំ២០១៦ រហូតជិត៤ពាន់លានដុល្លា នៅក្នុងឆ្នាំ២០១៨ និងមានការកើនឡើងជាបន្តបន្ទាប់ទៀត ។
ក្នុងឱកាសនោះដែល លោក ឃួង ស្រេង ក៏បានធ្វើសម្តែងនូវការស្វាគមន៍យ៉ាងកក់ក្តៅចំពោះដំណើរទស្សនៈកិច្ចរបស់គណៈប្រតិភូទីក្រុងឡុងប៊ិច ដែលដឹកនាំដោយលោកបណ្ឌិត រ៉ូប៊ើត ហ្គាសៀ អភិបាលក្រុងឡុងប៊ិច ដែលបានអញ្ញើញមកទស្សនៈកិច្ចជាផ្លូវការនៅ ព្រះរាជាណាចក្រកម្ពុជា ក្នុងន័យរិតចំណងមិត្តភាព សាមគ្គីភាព កិច្ចសហប្រតិបត្តិការ និងការចុះអនុស្សារណៈស្តីពីការចងសម្ព័ន្ធមេត្រីភាព រវាងរដ្ឋបាលនៃប្រទេសទាំងពីរ ភ្នំពេញ-ឡុងប៊ិច អោយកាន់តែរឹងមាំ និងកាន់តែស៊ីជម្រៅ ។
ក្នុងឱកាសចូលជួបសម្តែងការគួរសម និងពិភាក្សារបស់គណៈប្រិតភូទីក្រុងឡុងប៊ិច និងរដ្ឋបាលរាជធានីភ្នំពេញ ភាគីទីក្រុងទាំងពីរ ក៏បានបន្តធ្វើពិធីចុះអនុស្សារណៈនៃការយោគយល់គ្នា ស្តីពីការចងសម្ព័ន្ធមេត្រីភាពរវាងទីក្រុងឡុងប៊ិច រដ្ឋកាលីហ្វរញ៉ា នៃសហរដ្ឋអាមេរិក និងរាជធានីភ្នំពេញ នៃព្រះរាជាណចក្រកម្ពុជា ហើយការចង់សម្ព័ន្ធមេត្រីភាពនេះ គឺក្នុងគោលបំណងបង្កើនទំនាក់ទំនងវប្បធម៍ និងការអបរំ ក៏ដូចជាវិស័យសេដ្ឋកិច្ច និងចំណងមិត្តភាព រវាងប្រជាជននៃទីក្រុងទាំងពីរ តាមរយៈលក្ខខណ្ឌ និងខ្លឹមសារមួយចំនួន ដែលមាន
ដូចជា ទី១ ទីក្រុងទាំងពីរបានត្រៀមខ្លួនរួវជាស្រេច ដើម្បីអនុវត្តការផ្លាស់ប្តូរសហប្រតិបត្តិការ ដោយផ្អែកលើមូលដ្ឋានសមភាព និងផលប្រយោជន៍ទាំងសងខាង ។ ទី២ រាជធានីភ្នំពេញ និងទីក្រុងឡុងប៊ិច និងសម្របសម្រួលអោយមានការផ្លាស់ប្តូរកិច្ចសហប្រតិបត្តិការលើវិស័យផ្សេងៗ រួមមានសេដ្ឋកិច្ច ពាណិជ្ជកម្ម អប់រំ វប្បធម៍ កសិកម្ម ទេសចរណ៍ សុខាភិបាល និងធនធានមនុស្ស វិទ្យាសាស្រ្ត និងបច្ចេកវិទ្យា ជំរុញអោយមានការអភិវឌ្ឍជារួម ដើម្បីចែករំលែកភាពរីកចំរើនរវាងគ្នានិងគ្នា ។ទី៣ រាជធានីភ្នំពេញ និងទីក្រុងឡុងប៊ិច និងឯកភាពសម្របសម្រួលអោយមានការផ្លាស់ប្តូរដំណើរទស្សនៈកិច្ចរបស់តំណាងទីក្រុងរបស់ខ្លួនទៅវិញទៅមក ។ ទី៤ រក្សាទំនាក់ទំនងជាប្រចាំ ដើម្បីរក្សាបាននូវសម្ព័ន្ធមេត្រីភាពរបស់ថ្នាក់ដឹកនាំ និងអង្គភាពពាក់ព័ន្ធរបស់ទីក្រុងទាំងពីរ ដើម្បីជំរុញអោយមានកិច្ចពិភាក្សាជាបន្តបន្ទាប់ លើបញ្ហាពាក់ព័ន្ធកិច្ចសហប្រតិបត្តិការការផ្លាស់ប្តូរទ្វេភាគី រួមទាំងបញ្ហាផ្សេងៗទៀត ដែលភាគីទាំងពីមានចំណាប់អារម្មណ៍ ។ ទី៥ អនុស្សរណៈនៃការយោគយល់គ្នានេះ គឺដើម្បីពង្រឹងនូវការផ្លាស់ប្តូរកិច្ចសហប្រតិបត្តិការទ្វេភាគី ដោយមិនមានកាតព្វកិច្ចច្បាប់ណាមួយឡើយ ។
លោកឃួង ស្រេង សង្ឃឹម ជឿជាក់យ៉ាងមុតមាំថា បន្ទាប់ពីទីក្រុងទាំងពីរបានក្លាយជាសម្ព័ន្ធមេត្រីភាពការចុះអនុស្សារណៈនៃការយោគយល់គ្នា ស្តីពីការចងសម្ព័ន្ធមេត្រីភាពនេះហើយ ទីក្រុងទាំងពីរនិងមានការផ្លាស់ប្តូរដំណើរទស្សនៈកិច្ចជាបន្តបន្ទាប់ ដើម្បីឈានទៅពង្រឹង និងពង្រីកទំនាក់ទំនងទ្វេភាគី និងបាននាំមកនូវកាលានុវត្តភាពថ្មីមួយ សម្រាប់ជាប្រយោជន៍លើប្រទេសជាតិ និងប្រជាជននៃទីក្រុងទាំងពីរ ក្នុងស្មារតីផ្តល់ការគាំទ្រ និងការជួយគ្នាទៅវិញទៅមក លើគ្រប់វិស័យនាពេលខាងមុខជាក់ជាមិនខាន ៕
