រដ្ឋបាលជលផលប្រកាសឲ្យផ្អាកនេសាទត្រីកាម៉ុងរយៈពេល២ខែកន្លះក្នុងរដូវពងកូនរបស់ត្រីកាម៉ុង ឫត្រីប្លាធូ ចាប់ផ្តើមពីថ្ងៃទី២៥ ខែមករាតទៅ
ព្រះសីហនុ៖ ការនេសាទត្រីកាម៉ុង ឫ ត្រីប្លាធូ ត្រូវបានរដ្ឋបាលជលផល ប្រកាសប្រាប់ដល់ប្រជានេសាទសមុទ្រឲ្យផ្អាកជាបណ្តោះអាសន្នរយះពេល២ខែកន្លះ ព្រោះរដូវនេះគឺជារដូវ បង្ក
ពូជរបស់ត្រីត្រីកាម៉ុង ឫ ត្រីប្លាធូដោយគិតចាប់ពីថ្ងៃទី១៥មករាដល់ថ្ងៃទី៣១មិនាឆ្នាំ២០១៩ខាងមុខ នេះបើយោងតាមការបញ្ចាក់របស់លោក ឯម ភា នាររងរដ្ឋបាលជលផលកំពង់សោម ទទួលបន្ទុកក្តាប់រួម។
លោក ឯម ភា នាររងរដ្ឋបាលជលផលកំពង់សោម ទទួលបន្ទុកក្តាប់រួម បានគូសបញ្ជាក់ថា រដ្ឋបាលជលផល បានប្រកាសប្រាប់ប្រជានេសាទសមុទ្រឲ្យផ្អាកការនេសាទត្រីកាម៉ុង ឬត្រីប្លាធូ រយៈពេល ២ខែកន្លះ ដើម្បីទុកឱកាសឲ្យត្រីប្រភេទនេះពងកូនបន្តពូជក្នុងដែនសមុទ្រកម្ពុជា នារដូវបិទនេសាទឆ្នាំ២០១៩នេះ។ រដ្ឋបាលជល ផល នៃក្រសួងកសិកម្ម រុក្ខាប្រមាញ់ និងនេសាទ បានជូនដំណឺងដល់ប្រជានេសាទទាំងអស់ថា រដូវពងកូន បន្តពូជរបស់ត្រីកាម៉ុង «ប្លាធូ» នៅក្នុងដែននេសាទសមុទ្រនៃព្រះរាជាណាចក្រកម្ពុជា នឹងចាប់ផ្តើមពីថ្ងៃទី១៥ ខែមករា រហូតដល់ថ្ងៃទី៣១ ខែមីនាឆ្នាំ២០១៩។
រដ្ឋបាលជលផល ប្រាប់ឱ្យប្រជាពលរដ្ឋដែលប្រកបរបរនេសាទត្រីកាម៉ុង «ប្លាធូ» ទាំងអស់ នៅក្នុងដែននេសាទ សមុទ្រនៃព្រះរាជាណាចក្រកម្ពុជា ត្រូវបញ្ឈប់សកម្មភាពធ្វើនេសាទត្រីកាម៉ុង «ប្លាធូ» នេះ ចាប់ពីថ្ងៃទី១៥ ខែកមរា រហូតដល់ថ្ងៃទី៣១ ខែមីនា ឆ្នាំ២០១៩ ជាកំហិត។ ជាមួយនឹងការជូនដំណឺងអំពីការបិទមិនឱ្យនេសាទត្រីកាម៉ុង «ប្លាធូ» នេះដែរ រដ្ឋបាលជលផលបានបង្ហាញជំនឿថា ប្រជាពលរដ្ឋដែលប្រកបរបរនេសាទត្រីកាម៉ុង «ប្លាធូ»ទាំងអស់ នឹងចូលរួមគោរពតាមសេចក្តីជូនដំណឹងនេះ ដើម្បីរួមចំណែកថែរក្សានិងការពារធនធានជលផលសមុទ្រឱ្យបានគងវង្សទៅអនាគត។ ប្រភពដ៏ដែលបានបន្តថា៖ សម្រាប់ការនេសាទឆ្នាំនេះគឺមានការកើនឡើងតិចតួច បើប្រៀបធៀបទៅនឹងឆ្នាំមុនៗ។ចំពោះផលនេសាទសរុបរយះពេលមួយឆ្នាំប្រហាក់ប្រហែល៤០០០តោនក្នុងនោះផលនេសាទដែលបាននាំចេញមានតែប្រមាណ១០ %តែប៉ុណ្ណោះឯផលនេសាទ៩០%ទៀតគឺផ្គត់ផ្គង់ក្នុងស្រុកទាំងអស់ ដោយឡែក ត្រីកាម៉ុងនិងត្រីប្លាធូ កែច្នែជាត្រីមានចំនួន៥៣៦តោននាឆ្នាំកន្លងមក។ ត្រីកាម៉ុង ឫ ត្រីប្លាធូ គឺជាត្រីសមុទ្រមួយប្រភេទដ៏ពេញនិយម សម្រាប់ចម្អិនជាអារហាររបស់ពលរដ្ឋ រស់នៅ តាមតំបន់សមុទ្រ ជាពិសេសវិធីចម្អិនមួយប្រភេទដែលគេហៅថា ចូកតឹង គឺល្បីល្បាញខ្លាំងណាស់ ដោយគេយកត្រីកាម៉ុងស្រស់ៗ ទៅអាំងឱ្យឆ្អិនត្រឹមតែ៥០ ទៅ៧០ភាគរយប៉ុណ្ណោះ។ ដោយឡែកក្រៅពីឈ្មោះត្រីកាម៉ុង ឫ ត្រីប្លាធូ ត្រីមួយប្រភេទនេះ ត្រូវបានគេហៅតគ្នាថា«ត្រីចម្អុយ»ដែលមានដាក់លក់នៅលើទីផ្សារទូទាំងប្រទេស។
សូមបញ្ជាក់ថា៖ ត្រីកាម៉ុង ឫ ត្រីប្លាធូ ត្រូវបានអ្នកស្រាវជ្រាវបង្ហាញថា មានអត្ថប្រយោជន៍ច្រើនសម្រាប់ជួយដល់សរសៃឈាម និងបេះដូងរបស់មនុស្ស ដោយត្រីសមុទ្រប្រភេទនេះផ្ទុកទៅដោយសារធាតុអូមេហ្គា ៣ ដូចទៅនឹងត្រីសាលម៉នដែរ។ នៅក្នុង សាច់ត្រីកាម៉ុង ១០០ក្រាម មានអូមេហ្គា ៣ ប្រហែល ២-៣ក្រាម ដែលគ្រប់គ្រាន់សម្រាប់សេចក្តីត្រូវការរបស់រាងកាយ ប្រសិនបើបរិភោគជាប្រចាំថ្ងៃ ។ អូមេហ្គា ៣ (Omega-3) ជាខ្លាញ់ឆ្អែត ជួយកាត់បន្ថយអត្រាស្លាប់ ដោយសារជំងឺបេះដូង ជំងឺសរសៃឈាមត្បៀត បន្ថយកូលេស្តេរ៉ូល ត្រៃគ្លីសីរ៉ៃ រហូតដល់កំហាប់ស្អិតរបស់ឈាម៕