អាណោចអាអមណាស់!! យុវជន២នាក់ ជិះម៉ូតូឌុបគ្នា ត្រូវរថយន្តបុកពីក្រោយ បណ្តាលឲ្យម្នាក់បែកមុខស្លាប់ ក្នុងថ្លុកឈាម និងម្នាក់ទៀត របួសស្រាល
ភ្នំពេញ៖ យុវជនពីរនាក់ ជិះម៉ូតូឌុបគ្នាត្រូវរថយន្ត១គ្រឿង (មិនស្គាល់អត្តសញ្ញា) មកបុកពីក្រោយ ថែមទាំងកិនបែកមុខ បណ្ដាលឲ្យយុវជនម្នាក់ ស្លាប់ក្នុងថ្លុកឈាមមួយរំពេច នៅនឹងកន្លែងកើតហេតុតែម្តង ចំណែកម្នាក់ទៀត ត្រឹមរងរបួសស្រាល ឯរថយន្តបង្ក បើករត់គេចខ្លួនបាត់ស្រមោល ។
ហេតុការណ៍ខាងលើនេះ បានបង្កឲ្យមានការភ្ញាក់ផ្អើលយ៉ាងខ្លាំង កាលពីវេលាម៉ោងជាង១១យប់ថ្ងៃទី២ ខែកុម្ភៈ ឆ្នាំ២០១៩ នៅលើបណ្ដោយផ្លូវវេងស្រេង ស្ថិតក្នុងសង្កាត់ស្ទឹងមានជ័យទី៣ ខណ្ឌមានជ័យ ក្រុងភ្នំពេញ។
បើតាមប្រភពពីមិត្តភក្ដិ បានប្រាប់ឲ្យដឹងថា សពជនរងគ្រោះឈ្មោះ ឡាង ហៅ(ឆ្លាម) មុខរបរជាជាងដែក នៅម្ដុំវត្តអង្គតាមិញ មានស្រុកកំណើត ស្ថិតនៅភូមិគ្រាំងដែក ស្រុកទ្រាំង ខេត្តតាកែវ មានមធ្យោបាយធ្វើដំណើរ ម៉ូតូម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខភ្នំពេញ 1M-0483។
ប្រភពព័ត៌មានពីកន្លែងកើតហេតុ បានប្រាប់ឲ្យដឹងថា នៅមុនពេលកើតហេតុ គេឃើញយុវជនពីរនាក់ បាននឹងកំពុងតែជិះម៉ូតូមួយគ្រឿង ម៉ាកហុងដាឌ្រីមសេ១២៥ ពណ៌ខ្មៅពាក់ស្លាកលេខភ្នំពេញ1M-0483 ជិះឌុបគ្នា តាមបណ្ដោយផ្លូវវេងស្រេង ក្នុងទិសដៅពីកើតទៅលិច លុះមកដល់ចំណុចកើតហេតុ ស្រាប់តែមានរថយន្ត ប្រភេទធន់ធំមួយគ្រឿង មិនចាំម៉ាកបានបើកមកបុកម៉ូតូជនរងគ្រោះពីក្រោយ បណ្ដាលឲ្យយុវជនម្នាក់ បានធ្លាក់ពីលើម៉ូតូ ក៏ត្រូវរថយន្តកិនចំផ្ទៃមុខ បណ្ដាលឲ្យបែកហូរឈាមស្រោចខ្លួន ស្លាប់មួយរំពេច នៅនឹងកន្លែងយ៉ាងអាណោចអាធម ហើយយុវជនម្នាក់ទៀត បានដួលចំជើងទាំងសងខាង រងរបួសស្រាល។ ចំណែកឯរថយន្តបង្កវិញ មិនបានឈប់នោះទេ ថែមទាំងបើករត់គេចខ្លួន បាត់ស្រមោលតែម្តង។
ក្រោយកើតហេតុ សមត្ថកិច្ចមូលដ្ឋាន បានចុះមកដល់ និងទំនាក់ទំនង ទៅសមត្ថកិច្ចជំនាញ ចុះមកធ្វើការវាស់យកម៉ូតូ ទៅរក្សាទុកនៅប៉ុស្តិ៍រងចាំសាច់ញាតិ យកឯកសារមកផ្ទៀងផ្ទាត់ ដើម្បីយកត្រឡប់ទៅផ្ទះវិញ។ ដោយឡែកសពសមត្ថកិច្ច ធ្វើកោសល្យវិច័យរួច ប្រគល់ជូនសាច់ញាតិ ដឹកយកទៅស្រុកកំណើត ធ្វើបុណ្យតាមប្រពៃណី៕
