ឆេះក្លឹបកម្សាន្ដ ១៦៩ នៅក្រុងដូនកែវ ខេត្តតាកែវ បំផ្លាញសម្ភារខូចខាតអស់ជាង២ម៉ឺនដុល្លារ
តាកែវ៖ ទីតាំងក្លឹបកម្សាន្ត១៦៨ ស្ថិតក្នុងក្រុងដូនកែវ ខេត្តតាកែវ ត្រូវបានអគ្គិភ័យវាយប្រហារទាំងកណ្ដាលរាត្រី ថ្ងៃទី២៣ ខែកុម្ភៈ ឆ្នាំ២០១៩ បណ្ដាលពីការឆ្លងចរន្ដអគ្គិសនីចេញពីម៉ាស៊ីនត្រជាក់ បណ្ដាលឲ្យខូចខាតទ្រព្យសម្បត្តិសរុបគិតជាទឹកប្រាក់ជាង២ម៉ឺនដុល្លារ។
ស្នងការនគរបាលខេត្តតាកែវ លោកឧត្តមសេនីយ៍ទោ សុខ សំណាង បានប្រាប់ ឲ្យដឹងនៅព្រឹកថ្ងៃទី២៤ ខែកុម្ភៈ ឆ្នាំ២០១៩នេះថា បន្ទាប់ពីទទួលបានព័ត៌មាននេះ លោកបានដឹកនាំកម្លាំងនគរបាលខេត្ត ស្រុក-ក្រុង សហការជាមួយអាជ្ញាធរពាក់ព័ន្ធ ចុះអន្តរាគមន៍ជួយពន្លត់អគ្គិភ័យ ដោយប្រើប្រាស់រថយន្តពន្លត់អគ្គិភ័យចំនួន៥គ្រឿង និងប្រើប្រាស់ទឹកអស់ចំនួន១០រថយន្ត ទើបពន្លត់បានជាស្ថាពរ។
លោកឧត្តមសេនីយ៍ស្នងការ បានបន្ថែមថា ក្លឹបកម្សាន្ត ដែលត្រូវអគ្គិភ័យវាយប្រហារនេះ ទំហំ៧ម៉ែត្រ គុណ៨ម៉ែត្រ ធ្វើអំពីបេតុង ប្រក់ស័ង្កសី ដែលការខូចខាតសម្ភាររួមមាន៖ ម៉ាស៊ីនត្រជាក់៤គ្រឿង, ឧបករណ៍តន្ត្រីសម័យ (អកកាដង់) ១ឈុត, សាឡុងចំនួន១០, កៅអីជ័រ-កៅអីឈើមួយចំនួន, ស្រាបៀចម្រុះមួយចំនួន និងទូរស័ព្ទដៃមួយចំនួនទៀត គិតជាទឹកប្រាក់ជាង២ម៉ឺនដុល្លារ។ ហេតុការណ៍នេះ មិនបណ្ដាលឲ្យមនុស្សរងគ្រោះថ្នាក់ នោះទេ ៕
