ប្រធានមន្ទីរសាធារណៈការ ខេត្តព្រះវិហារអំពាវនាវអោយប្រជាពលរដ្ឋកុំចាក់ដីលុបប្រឡាយទឹក លុបមុខទឹក និងចាក់ដីខ្ពស់ជាងថ្នល់ រំលោភបំពានដីចំណីថ្នល់
ព្រះវិហារ៖មន្ទីរសាធារណៈការនិងដឹកជញ្ជូនខេត្តព្រះវិហារលោកសំលាងទ្រីបានធ្វើការអំពាវនាវអោយប្រជាពលរដ្ឋទាំងអស់ កុំចាក់ដីលុបប្រឡាយទឹក លុបមុខទឹក និងចាក់ដីខ្ពស់ជាងថ្នល់និងការរំលោភបំពានដីចំណីថ្នល់ជាដើម។
ការអំពាវនាវបែបនេះគឺស្របពេលដែលក្រុមការងារថែរទាំផ្លូវជាតិលេខ ៩៥បាននិងកំពុងស្ដារប្រឡាយរំដោះទឹកនៅក្នុងឃុំពុទ្រា ស្រុកជ័យសែនខេត្តព្រះវិហារដើម្បីបើកមុខទឹកអោយហូររំដៅការលិចលង់ថ្នល់និងភូមិដ្ឋានរបស់ប្រជាពលរដ្ឋ។
លោកសំលាងទ្រីបានមានប្រសាសន៍លើកឡើងថានៅថ្ងៃទី ២៥កក្កដា២០១៩នេះ ក្រុមការងារថែរទាំផ្លូវជាតិលេខ ៩៥បានស្ដារប្រឡាយរំដោះទឹក នៅគីឡូម៉ែត្រលេខ ៣៨+៤០០ ស្ថិតក្នុងឃុំពុទ្រា ស្រុកជ័យសែនខេត្តព្រះវិហារបានប្រវែង៣២០ម៉ែត្រ។
លោកបញ្ជាក់ថានេះជាហេតុផលមួយក្នុងចំណោមហេតុផលជាច្រេីនដែលបណ្ដាលអោយផ្លូវថ្នល់ឆាប់ខូច។ អាស្រ័យហេតុនេះ លោកសូមអោយពុកម៉ែ បងប្អូន មេត្តាកុំចាក់ដីលុបប្រឡាយទឹក លុបមុខទឹក និងចាក់ដីខ្ពស់ជាងថ្នល់ រំលោភបំពានដីចំណីថ្នល់ជាដេីម៕