កុំខ្លាក្នុងស្រុក ហើយក្លាយជាទន្សាយក្រៅស្រុក
ភ្នំពេញ៖លោកជា ច័ន្ទបរិបូរណ៌ប្រធានសហព័ន្ធកីឡាអេឡិចត្រូនិកកម្ពុជា(E-Sport)បាន ថ្លែងនៅចំពោះមុខកីឡាករ E-Sportកម្ពុជាចំនួន៥រូបដែលត្រូវទៅចូលរួមប្រកួតកីឡាស៊ីហ្គេម នៅប្រទេសហ្វីលីពីននាល្ងាចថ្ងៃទី៤តុលាថាជាអ្នកកីឡាកុំគ្រាន់តែជាខ្លាក្នុងស្រុកហើយនៅក្រៅស្រុកជាទន្សាយនោះ ។
លោកព្រមានថានៅពេលប្រកួតបើចាញ់គេត្រូវតែទទួលស្គាល់ថាចាញ់កុំប្រើពាក្យថា ទៅដកស្រង់បទពិសោន៍ដាច់ខាត ។ពេលនេះកីឡាអេឡិចត្រូនិកកម្ពុជាកំពុងតែធ្វើឲ្យគេចាប់អារម្មណ៍ខ្លាំងណាស់ ។នេះជាលើកដំបូងហើយដែលកីឡាE-Sportត្រូវបានចុះបញ្ជីនៅក្នុងការ ប្រកួតកីឡាស៊ីហ្គេមក្នុងខណៈដែលហ្វីលីពីនធ្វើជាម្ចាស់ផ្ទះនោះ ។
ប្រមុខកីឡាE-Sportកម្ពុជារូបនេះទទួលស្គាល់ថាហ្វីលីពីនពិតជាខ្លាំងហើយបានជាគេ សម្រេចចិត្តចុះបញ្ជីកីឡានេះទៅក្នុងការប្រកួតកីឡាស៊ីហ្គេមបែបនេះ ។ការប្រកួតកីឡាស៊ីហ្គេមលើកទី៣០នេះកីឡាE-Sportត្រូវ បានគេដាក់ឲ្យប្រកួតចំនួន៥វិញ្ញាសាតែសម្រាប់កម្ពុជា ត្រៀមលេងវិញ្ញាសាMobile Legend Bang Bang ដែលជាវិញ្ញាសាប្រកួតតាមរយៈទូរស័ព្ទស្មាតហ្វូន(Smart Phone)។
ក្រុមកម្ពុជាដែលត្រូវទៅចូលរួមប្រកួតនោះគឺក្រុមHelheimដែលជាក្រុមខ្លាំងជាងគេនៅ ស្រុកខ្មែរ ។ក្រុមនេះបានយកឈ្នះក្រុមMen Version pro ក្នុងការប្រកួតផ្ដាច់ព្រ័ត្រកន្លងមកថ្មីៗនេះ ។
មកទល់ពេលនេះមានប្រទេសចំនួន៩ហើយដែលបាន ចុះបញ្ជីចូលរួមប្រកួតកីឡាអេឡិចត្រូនិកនេះនៅក្នុងការប្រកួតកីឡាស៊ីហ្គេម ។មានតែប្រទេសប្រ៊ុយណេ និងប្រទេសទីម័រ ខាងកើតប៉ុណ្ណោះដែលមិនទាន់ឃើញចុះឈ្មោះចូលរួមប្រកួតនឹងគេ ។
នៅពេលដែលចោទសួរថាតើក្នុងចំណោមប្រទេសទាំង៩នេះប្រទេសណាជាឩបសគ្គ សម្រាប់កម្ពុជានោះលោកជា ច័ន្ទបរិបូរណ៌មានប្រសាសន៍ថាហ្វីលីពីនដែលជាម្ចាស់ផ្ទះគឺជាក្រុមដែលត្រូវប្រយ័ត្នចំពោះប្រទេសថៃក៏យើងមិនអាចមើលរំលងបានដែរ ។
លោកក៏បានប្រាប់ទៅកីឡាករទាំង៥រូបដែលត្រូវទៅចូលរួមប្រកួតកីឡាស៊ីហ្គេមថាត្រូវ ប្រយ័ត្នពីដូពីង(ការប្រើប្រាស់ថ្នាំលើកកម្លាំងដែលហាមមិនឲ្យប្រើនៅក្នុងកីឡា)។ប្រកួតចប់បើ គេរកឃើញថាមានសារធាតុដូពីងនោះគឺត្រូវដកមេដាយមកវិញជាមួយគ្នានេះកិត្តិយសរបស់ កីឡាករ និងប្រទេសជាតិត្រូវធ្លាក់ចុះតែម្ដង ។
សូមបញ្ជាក់ថាការចេញទៅប្រកួតនេះក្រុមកីឡាករE-Sportកម្ពុជាបានទទួលការជួយ ឩបត្ថម្ភពីក្រុមហ៊ុនទូរស័ព្ទសែលកាត និងបណ្ដាក្លិបនានារបស់សហព័ន្ធ ៕