រថយន្តឡិចស៊ីសRX៤០០H បុករថយន្តធំ គៀបមនុស្សក្នុងឡានរបួសធ្ងន់ស្រាល៤នាក់
ភ្នំពេញ៖ គ្រោះថ្នាក់ចរាចរណ៍មួយរវាងរថយន្ដ Luxus បើកបុករថយន្ដធុនធំបើកបញ្ច្រាសទិសគ្នា បណ្ដាលឲ្យមនុស្ស ៤នាក់រងរបួសធ្ងន់ស្រាល ដោយសារគាបជាប់ក្នុងរថយន្ត។ ហេតុការណ៍នេះកើតឡើងនៅរសៀលថ្ងៃទី១៥ ខែវិច្ឆិកា ឆ្នាំ២០២០ នៅតាមផ្លូវបេតុងព្រៃស ភូមិពងទឹក សង្កាត់ពងទឹក ខណ្ឌដង្កោ រាជធានីភ្នំពេញ។
សមត្ថកិច្ច បានឲ្យដឹងថា រថយន្តម៉ាក LEXUS RX400H ពណ៌ស ពាក់ផ្លាកលេខ ភ្នំពេញ 2AI-5525 បើកបរដោយបុរសម្នាក់ឈ្មោះ សួន ធារិទ្ធ ភេទប្រុស អាយុ៣៤ឆ្នាំ មុខរបរលក់ដូរ មានទីលំនៅបុរីពិភពថ្មី២ ភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ (ត្រូវជាប្តីរងរបួសធ្ងន់)។ ចំណែកអ្នករួមដំណើរទី១.ឈ្មោះ ហុង រ៉ានី ភេទស្រី អាយុ៣៤ឆ្នាំ មុខរបរលក់ដូរ (ត្រូវជាប្រពន្ធ រងរបួសឆ្ងន់) ទី២.ឈ្មោះ ប៉ុន ម៉ារីណា ភេទស្រី អាយុ ០៧ឆ្នាំ មុខរបរសិស្ស (ត្រូវជាកូន រងរបួសធ្ងន់) និងទី៣.ឈ្មោះ សុង ពិសិដ្ឋ ភេទប្រុស អាយុ១៥ឆ្នាំ មុខរបរសិស្ស មានទីតាំងស្ថិតនៅភូមិដំណាក់ធំ១ សង្កាត់ស្ទឹងមានជ័យ ខណ្ឌមានជ័យ ភ្នំពេញ (ត្រូវជាក្មួយ រងរបួសស្រាល)។ ជនរងគ្រោះទាំង ០៤នាក់ ត្រូវបានដឹកយកទៅសង្គ្រោះនៅមន្ទីពេទ្យ។
ចំណែករថយន្តម៉ាក HIYUNDIA ពណ៌ស ពាក់ផ្លាកលេខ ភ្នំពេញ 3D-9727 បើកបរដោយបុរសម្នាក់ ពុំស្គាល់អត្តសញ្ញាណ (រត់គេចខ្លួន)។
ករណីគ្រោះថ្នាក់ចរាចរណ៍នេះ ត្រូវបានកម្លាំងកងប្រតិបត្តិការរុករក និងសង្គ្រោះ៧១១ កងពលតូចលេខ៧០ បានចេញទៅអន្តរាគមន៍ជួយសង្គ្រោះជនរងគ្រោះ ដោយមានរថយន្តកាត់ និងរថយន្តសង្គ្រោះផងដែរ។
បច្ចុប្បន្ន រថយន្ដទាំង ២គ្រឿង ត្រូវបានប្រគល់ទៅការិយាល័យចរាចរណ៍ផ្លូវគោករាជធានីភ្នំពេញ ដើម្បីដោះស្រាយនៅពេលក្រោយ៕
