កម្ពុជា នៅតែបារម្ភ ពីស៊ីហ្គេមឆ្នាំ២០២៣
ភ្នំពេញ៖កម្ពុជាបានធ្វើការប្ដេជ្ញាថានឹងធ្វើឲ្យបានជោគជ័យដាច់ខាតសម្រាប់ព្រឹត្តិការណ៍ស៊ីហ្គេមលើកទី៣២ឆ្នាំ២០២៣ដែលកម្ពុជានឹងធ្វើជាម្ចាស់ផ្ទះជាលើកដំបូងនោះ ។
ពេលនេះកម្ពុជាក៏ដូចជាពិភពលោកទាំងមូលកំពុងតតែរងនៅការរំខាននៃមេរោគផ្លូវដង្ហើមប្រភេទថ្មីដែលគេហោថាកូវីដ ១៩នោះតែទោះជាយ៉ាងនេះក្ដីក៏កម្ពុជានៅតែមានជំនឿចិត្តថាឆ្នាំ២០២៣ស៊ីហ្គេមនៅកម្ពុជាគឺជាស៊ីហ្គេមដែលល្អបំផុត ។
កម្ពុជានឹងកសាងប្រវត្តិសាស្ត្រថ្មីដោយធ្វើឲ្យព្រឹត្តិការណ៍ថ្នាក់តំបន់មួយនេះក្លាយជាព្រឹត្តិការណ៍ដែលស្អាតគឺជាព្រឹត្តិការណ៍ប្រកួតដោយយុត្តិធម៌គឺកម្ពុជានឹងផ្លាស់ប្ដូរឥរិយាបទស៊ីហ្គេមពីព្រឹត្តិការណ៍ចែកមេដាយគ្នា ឬ ជាព្រឹត្តិការណ៍សម្រាប់ប្រទេសជាម្ចាស់ផ្ទះប្រមូលមេដាយឲ្យទៅជាព្រឹត្តិការណ៍ប្រកួតដោយយុត្តិធម៌ (Fair- Play) ដែលពុំធ្លាប់មានពីមុនមក ។
ជាការពិតហើយពេលនេះកម្ពុជានៅបារម្ភពីបច្ចេកទេសនៃការកសាងសមត្ថភាពកីឡាករ កីឡាការិនីដោយសារតែការយារយីនៃកូវីដ ១៩ ។កម្ពុជាបានដាក់ផែនការបញ្ជូនកីឡាករ កីឡាការិនីទៅហកវឹកហាត់រយៈពេលយូរនៅក្រៅប្រទេសតាំងពីដើមឆ្នាំ២០២០មកម្ល៉េះតែស្ទើរតែដាច់ឆ្នាំ២០២០ទៅហើយគម្រោងនេះត្រូវបានពន្យារដោយសារតែកូវីដ ១៩ ។
ឯកឧត្តមវ៉ាត់ ចមរើនអគ្គលេខាធិការគណៈកម្មាធិការជាតិអូឡាំពិកកម្ពុជា និង ជាអគ្គលេខាធិការគណៈកម្មាធិការជាតិរៀបចំស៊ីហ្គេមឆ្នាំ២០២៣(Camsoc)ដើមឆ្នាំ២០២១ដែលយ៉ាងយូរបំផុតក្នុអម្លុងខែមីនាកីឡាករកីឡាការិនីជាង១០០នាក់នឹងចេញទៅហាត់រយៈពេលយូរនៅក្រៅប្រទេស ។
ប្រទេសចំនួន១២ដែលភាគច្រើននៅអាស៊ី និង មួយចំនួននៅទ្វីបអឺរុបនោះនឹងទទួលយកកីឡាករ កីឡាការិនីទៅហ្វឹកហាត់ទីនោះពិសេសប្រទេសចិន កូរេខាងត្បូង និង ជប៉ុន ។
មុននឹងឈានដល់ស៊ីហ្គេមឆ្នាំ២០២៣កម្ពុជានឹងកំណត់សមត្ថភាពរបស់កីឡាករ កីឡាការិនីនៅក្នុងស៊ីហ្គេមលើកទី៣១ឆ្នាំ២០២១នៅទីក្រុងហាណូយប្រទេសវៀតណាម ។កម្ពុជាដែលគ្រងតំណែងចំណាត់ថ្នាក់លេខ៨នៅស៊ីហ្គេមចំនួន៣លើកជាប់គ្នាហើយនោះបានប្ដេជ្ញាថាស៊ីហ្គេមឆ្នាំ២០២១នឹងដណ្ដើមមេដាយឲ្យបានកាន់តែល្អជាង៣លើកកន្លងមក ។
សព្វថ្ងៃនេះការហ្វឹកហាត់ក្នុងស្រុកក៏នៅមានកម្រិតដោយសារតែអ្វីៗត្រូវប្រយ័ត្នប្រយែងជាមួយនឹងមេរោគកូវីដ ១៩តែទោះជាយ៉ាងណាក៏សហព័ន្ធជាតិនានាសុទ្ធតែដាក់ក្ដីជឿជាក់ទៅលើសមត្ថភាពកីឡាករ កីឡាការិនីរបស់ខ្លួន ជាមួយគ្នានេះប្រធានសហព័ន្ធជាច្រើនរូបបានប្រកាសពីការលាលែងពីតំណែងប្រសិនបើរកមេដាយមិនបាននោះ ៕