កាយសម្ព័ន្ធប្រកាស ពីការប្រកួតជើងឯកជាតិ និង ពានរង្វាន់ឯកឧត្តមប្រធានសហព័ន្ធលើកទី៤
ភ្នំពេញ៖បន្ទាប់ពីការពន្យារពេលប្រកួតដោយសារតែការរំខាននៃមេរោគកូវីដ ១៩នោះ សហព័ន្ធកីឡាកាយសម្ព័ន្ធកម្ពុជាបានប្រកាសជាថ្មីពីកាលបរិច្ឆេទ នៃការប្រកួតជើងឯកជាតិឆ្នាំ២០២០ រួមជាមួយការប្រកួតដណ្ដើមពានរង្វាន់ ឯកឧត្តមបណ្ឌិតថោង ខុនលើកទី៤ទៀតផង ។
លោកណយ ផាណា អគ្គលេខាធិការសហព័ន្ធកីឡាកាយសម្ព័ន្ធកម្ពុជា បានប្រាប់ឲ្យដឹងថា នេះជាការប្រកួតជ្រើសរើសកីឡាករកីឡាការិនីប្រចាំឆ្នាំ២០២០ និងជ្រើសរើសកីឡាករ កីឡាការិនីឆ្នើមសម្រាប់ការប្រមូលផ្ដុំ ក្នុងក្រុមជម្រើសជាតិឆ្នាំ២០២១ជាមួយនឹងការត្រៀមលក្ខណៈសម្រាប់ចេញទៅហ្វឹកហាត់ នៅប្រទេសចិនក្នុងឆ្នាំ២០២១នេះ ។
លោកបន្តថា ការប្រកួតនេះគឺមិនមានការកម្រិតអាយុឡើយតែកីឡាករ កីឡាការិនីត្រូវតែមកពីបណ្ដាក្លិប ឬ សមាគមដែលជាសមាជិករបស់ព័ន្ធកីឡាកយសម្ព័ន្ធកម្ពុជា ។ការប្រកួតនឹងចាប់ផ្ដើមពីថ្ងៃទី១៤ ដល់ថ្ងៃទី១៩មករាឆ្នាំ២០២១ ។សូមបញ្ជាក់ថា កាយសម្ព័ន្ធចែកចេញជា២ប្រភេទគឺកាយសម្ព័ន្ធអាអេរ៉ូប៊ិក(Aerobic) និង កាយសម្ព័ន្ធអាកទីស្ទីក (Artistic) ។
ចំពោះវិញ្ញាសាដែលដាក់ឲ្យប្រកួតនោះមាន៖សម្រាប់ប្រភេទកាយសម្ព័ន្ធអាកទីស្ទីក (Artistic)វិញ្ញាសាប្រកួតជាក្រុម៦នាក់បុរស ការប្រកួតសរុបឧបករណ៍ទាំ៦(ឧបករណ៍កម្រាល សេះលោត សេះកង របាស្រប កង និង របាហ្នឹង ) ។ឧបករណ៍ជំនាញបុរសសេះលោតជំនាញសេះកង ជំនាញកម្រាល ជំនាញកង ជំនាញរបាស្រប និង ជំនាញរបាហ្នឹង ។
ចំពោះកាយសម្ព័ន្ធអាអេរ៉ូប៊ិក(Aerobic) វិញមានវិញ្ញាសាឯកត្តជនបុរស វិញ្ញាសាឯកត្តជននារី វិញ្ញាសាគូចម្រុះ(បុរស នារី )អាអេរ៉ូប៊ិកទ្រីយ៉ូ(TRIO)បុរស នារី និងវិញ្ញាសាអាអេរ៉ូប៊ិកក្រុមចម្រុះ៥នាក់ ៕