ទិវាជាតិទីក្រុងស្អាតលើកទី៩ ក្រោមប្រធានបទ “ទម្លាប់ថ្មី ដើម្បីទីក្រុងស្អាត” អមជាមួយ ការប្រកាស “ចលនាប្រឡងប្រណាំង ទីក្រុងស្អាតលើកទី៣”
ភ្នំពេញ ៖ សារលិខិត សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងប្រធានកិត្តិយស នៃគណៈកម្មាធិការជាតិវាយតម្លៃទីក្រុងស្អាត នាឱកាសទិវាជាតិទីក្រុងស្អាតលើកទី៩ ក្រោមប្រធានបទ “ទម្លាប់ថ្មី ដើម្បីទីក្រុងស្អាត” អមជាមួយ ការប្រកាស “ចលនាប្រឡងប្រណាំង ទីក្រុងស្អាតលើកទី៣” ថ្ងៃព្រហស្បតិ៍ ទី ២៥ ខែកុម្ភៈ ឆ្នាំ ២០២១។
សម្តេចតេជោ ហ៊ុន សែន បានថ្លែងថា ការប្រារព្ធទិវាជាតិនេះពិតជាបាន រួមចំណែកបំផុស និងលើកទឹកចិត្តដល់បងប្អូនជនរួមជាតិទាំងអស់ ពិសេសចំពោះយុវជន កុលបុត្រ កុលធីតា ខ្មែរឱ្យបន្តជំរុញ និងយកចិត្តទុកដាក់កាន់តែខ្ពស់បន្ថែមទៀតក្នុងការលើកកម្ពស់ការអភិវឌ្ឍបៃតង ការផ្តល់នូវ បដិសណ្ឋារកិច្ចល្អ ដែលជាការរួមចំណែកដល់ការអភិវឌ្ឍវិស័យទេសចរណ៍ និងការរីកចម្រើននៃសង្គមជាតិយើង។
បច្ចុប្បន្ន កម្ពុជាមានសុខសន្តិភាព ស្ថិរភាពនយោបាយ សណ្តាប់ធ្នាប់សាធារណៈ ប្រព័ន្ធហេដ្ឋារចនាសម្ព័ន្ធ ល្អប្រសើរ និងមានការអភិវឌ្ឍលើគ្រប់វិស័យ ជាមួយនឹងកំណើនសេដ្ឋកិច្ចខ្ពស់គួរឱ្យកត់សំគាល់ក្នុងរយៈពេល ប៉ុន្មានឆ្នាំចុងក្រោយនេះ។ លើសពីនេះទៀត ក្នុងដំណើរឆ្ពោះទៅមុខ កម្ពុជាត្រូវបន្តខិតខំប្រឹងប្រែងឱ្យកាន់តែ ខ្លាំងក្លាបន្ថែមទៀត ដើម្បីទទួលបាននូវភាពរីកចម្រើនសម្រេចបានតាមបំណងប្រាថ្នារបស់ខ្លួនសំដៅបន្តកែលម្អ ជីវភាពនិងការរស់នៅរបស់ប្រជាជន និងការរួមចំណែកថែរក្សាភពផែនដីរបស់យើងសម្រាប់កូនចៅជំនាន់ក្រោយៗ ទៀត។ ក្នុងនោះ កម្ពុជាត្រូវបន្តយកចិត្តទុកដាក់ខ្ពស់លើការងារសំខាន់ៗជាអាទិ៍៖ ការបន្តកាត់បន្ថយភាពក្រីក្រ ការលើកកម្ពស់សុខភាព និងសុខុមាលភាពប្រជាជន ការគិតគូរពីចីរភាពនៅតាមបណ្តាទីក្រុង ការឆ្លើយតបនឹង បញ្ហាបម្រែបម្រួលអាកាសធាតុ កិច្ចការពារ និងអភិរក្សធនធានធម្មជាតិជាដើម។
ក្នុងស្មារតីឆ្លើយតបទៅនឹងការវិវត្តន៍និងនិន្នាការអភិវឌ្ឍន៍ថ្មីៗនេះ កម្ពុជាត្រូវបន្តយកចិត្តទុកដាក់លើការ ដាក់ចេញនិងអនុវត្តនូវគោលនយោបាយនិងយុទ្ធសាស្ត្រអភិវឌ្ឍន៍ជាតិនានា ដោយឈរលើមូលដ្ឋានសំខាន់ ២ ដែលត្រូវគិតគូរស្របពេលគ្នាគឺ៖ ការបង្កើនឧត្តមភាពប្រកួតប្រជែងនិងការធានាចីរភាពនៃការអភិវឌ្ឍ។ ឈរលើ មូលដ្ឋាននេះ កម្ពុជាក៏បានដាក់ចេញនូវយុទ្ធនាការ “ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អៗ ដែលជាយុទ្ធសាស្ត្រមួយដ៏សមស្របក្នុងការចូលរួមអភិវឌ្ឍវិស័យទេសចរណ៍ជាមាសបៃតង និងនាំកម្ពុជាឆ្ពោះទៅ រកភាពស្អាត និងបៃតង និងប្រកបដោយសុវត្ថិភាពខ្ពស់។
ឆ្នាំនេះ គឺជាឆ្នាំទី៩ ដែលយើងប្រារព្ធទិវាជាតិទីក្រុងស្អាត ក្រោមប្រធានបទ “ទម្លាប់ថ្មី ដើម្បីទីក្រុងស្អាត អមជាមួយការប្រកាស “ចលនាប្រឡងប្រណាំងទីក្រុងស្អាតលើកទី៣”។ តាមរយៈប្រធានបទនេះ ឆ្លុះបញ្ចាំង យ៉ាងច្បាស់ថា ប្រជាពលរដ្ឋគ្រប់រូបតែងតែប្រាថ្នាចង់រស់នៅក្នុងទីក្រុងប្រកបដោយភាពវៃឆ្លាត និងមាន “ភាពស្អាត និងបៃតង ” យកចិត្តទុកដាក់អំពីអនាម័យជុំវិញមជ្ឈដ្ឋានរស់នៅរបស់ពួកគាត់ មានការធានាសន្តិសុខ សុវត្ថិភាពពេញលេញ មានការរៀបចំសណ្តាប់ធ្នាប់របៀបរៀបរយល្អ មានការផ្តល់សេវាសាធារណៈប្រកបដោយ បដិសណ្ឋារកិច្ចល្អ ពោល គឺជាទីកន្លែងដែលអាចផ្តល់នូវភាពកក់ក្តៅយ៉ាងពិតប្រាកដសម្រាប់ការរស់នៅពួកគាត់។ “ស្អាត” ដែលនេះជាអភិក្រមថ្មីនៅក្នុងការជំរុញវិស័យទេសចរណ៍របស់យើងក្នុងបរិបទក្នុងនិងក្រោយជំងឺឆ្លង កូវី៨-១៩។ ក្នុងន័យនេះ “ស្អាតដោយមានទេសភាពស្រស់ត្រកាល , ស្អាតដោយភាពប្រណិត ស្អាតដោយមាន បរិស្ថានល្អប្រសើរ ស្អាតដោយមានអនាម័យ ស្អាតដោយមានសុវត្ថិភាព ស្អាតដោយមានគុណភាព និងស្អាត ដោយមានឱជារសឆ្ងាញ់ពិសា។ល។
ក្នុងស្មារតីនេះ ឆ្លើយតបនឹងប្រធានបទនៃទិវាជាតិទីក្រុងស្អាត “ទម្លាប់ថ្មី ដើម្បីទីក្រុងស្អាត” និង “ទីក្រុងស្អាត ដើម្បីទេសចរណ៍” ក្នុងនាមរាជរដ្ឋាភិបាល សម្តេចសូមឱ្យស្ថាប័នពាក់ព័ន្ធ រដ្ឋបាលថ្នាក់ក្រោមជាតិ និងប្រជាពលរដ្ឋ ត្រូវ ៖
ទី១. បន្តពង្រឹងភាពជាដៃគូរដ្ឋ-ឯកជនក្នុងការចូលរួមដល់យុទ្ធនាការទប់ស្កាត់ការឆ្លងជំងឺកូវីដ-១៩ ពិសេសត្រូវផ្តល់សេវាកម្មប្រកបដោយសុវត្ថិភាពពីព្រោះថា ការបង្កើននូវភាពជឿទុកចិត្ត និងភាពជឿជាក់ លើគ្រប់ខ្សែសង្វាក់នៃផលិតកម្មក្នុងវិស័យទេសចរណ៍ គឺជាចំណុចគន្លឹះអាទិភាពសម្រាប់ ការទាក់ទាញទេសចរ។ ក្នុងន័យនេះ គ្រប់តួអង្គពាក់ព័ន្ធទាំងអស់ក្នុងវិស័យទេសចរណ៍ ត្រូវបន្ត អនុវត្តឱ្យបានខ្ជាប់ខ្ជួនវិធានសុវត្ថិភាពទេសចរណ៍ និងវិធានសុខាភិបាលព្រោះថា “អ្វីៗនឹងមិន ត្រលប់ទៅរកសភាពដើមវិញទេ ដូចនេះយើងត្រូវចេះសម្របខ្លួនរៀនរស់ក្នុងសភាពថ្មីមួយ ពោល គឺត្រូវចេះរក្សាអនាម័យឱ្យបានខ្ជាប់ខ្លួន និងមានការប្រយ័ត្នប្រយែង កុំធ្វេសប្រហែសឱ្យសោះ។
ទី២. សហគ្រិន/និយោជក (គំរូអាជីវកម្មថ្មី)៖ សហគ្រិន /និយោជកគួរគិតគូរ អំពីគំរូអាជីវកម្មប្រភេទថ្មី ជាមួយដំណោះស្រាយឌីជីថល តាមរយៈការប្រើប្រាស់បច្ចេកវិទ្យាជាជំនួយ ខណៈដែលបច្ចុប្បន្ន នេះសកលលោកបានផ្លាស់ប្តូរទៅរករបត់ថ្មី ដែលបច្ចេកវិទ្យាឌីជីថលបាន នាំមកនូវវិធីសាស្ត្រ អនុវត្តថ្មី ទម្លាប់ថ្មី ការរស់នៅ និងជីវិតថ្មី។ ការរីករាលដាលនៃជំងឺកូវីដ-១៩ជាសកល បានជំរុញឱ្យយើងប្រើប្រាស់បច្ចេកវិទ្យានិងប្រព័ន្ធឌីជីថលកាន់តែខ្លាំងជាងមុន។ រីឯនិយោជិក /បុគ្គលិកក៏គួរ គិតគូរផងដែរ អំពីការពង្រឹងសមត្ថភាពជំនាញ ដើម្បីមានសមត្ថភាព និងលទ្ធភាពគ្រប់គ្រាន់ក្នុង ការបត់បែនទៅតាមការប្រែប្រួលយ៉ាងឆាប់រហ័សនៃចរន្តសេដ្ឋកិច្ច។ ត្រូវពង្រឹងសមត្ថភាព និង គុណភាព ពិសេសការបង្កើនផលិតភាព ដើម្បីត្រៀមខ្លួនក្នុងការប្រកួតប្រជែងក្នុងទីផ្សារការងារ ដែលនៅពេលខាងមុខ ទីផ្សារនេះនឹងកាន់តែរួមចង្អៀត ហើយខ្សែសង្វាក់ផ្គត់ផ្គង់កាន់តែបង្រួមខ្លី៕ 
