អ្នកនាំពាក្យបដិសេធ ៖ ការចុះផ្សាយព័ត៌មាន ករណីគំរាមចាប់ខ្លួន អ្នកការពារបរិស្ថាន នៅសង្កាត់បឹងទំពន់១ ខណ្ឌមានជ័យ
ភ្នំពេញ ៖ អ្នកនាំពាក្យនៃស្នងការដ្ឋាននគរបាលរាធានីភ្នំពេញ បានបដិសេធចំពោះការចុះផ្សាយព័ត៌មាន ខុសពីការពិតទាំងស្រុង ថាមានករណីគំរាមចាប់ខ្លួនអ្នកការពារបរិស្ថាន នៅសង្កាត់បឹងទំពន់១ ខណ្ឌមានជ័យ។
អ្នកនាំពាក្យនៃស្នងការដ្ឋាននគរបាលរាជធានីភ្នំពេញ មានកិត្តិយសជម្រាបជូនបងប្អូនប្រជាពលរដ្ឋ ក៏ដូចជាមជ្ឈដ្ឋានទូទៅ ឱ្យបានជ្រាបច្បាស់លេីការចោទប្រកាន់ខុស ពីការពិតមកលេីសមត្ថកិច្ច តាមពិតជាក់ស្តែង នៅព្រឹកថ្ងៃអង្គារ ទី០៧ ខែកញ្ញា ឆ្នាំ២០២១ កម្លាំងការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ បានសហការជាមួយ អាជ្ញាធរមូលដ្ឋានសង្កាត់បឹងទំពន់១ បានចុះធ្វេីរដ្ឋបាល ត្រួតពិនិត្យនៅតាមបន្ទប់ជួល នៅសង្កាត់បឹងទំពន់១ ដោយសារមានជនសង្ស័យ លេីបទល្មេីសឆក់ រត់ចូលក្នុងទីតាំង ដូចបានបញ្ជាក់ខាងលេី ពេលកំពុងអនុវត្តការងារ ក៏មានយុវជន២នាក់ ចេញមកថតសកម្មភាព អនុវត្តការងាររបស់សមត្ថកិច្ចដោយពុំមានការអនុញ្ញាត ដោយឃេីញដូច្នេះសមត្ថកិច្ចជំនាញ ក៏បានធ្វេីការណែនាំអប់រំ និងឱ្យលប់រូបនេះចេញវិញ ដោយមិនបានធ្វេីការឃាត់ខ្លួន ឬដាក់ទោសអ្វីឡេីយ ។
ក្នុងនាមសមត្ថកិច្ច នៃស្នងការដ្ឋាននគរបាលរាជធានីភ្នំពេញ សូមធ្វេីការអំពាវនាវ ដល់គ្រប់សារព័ត៌មានជាតិ អន្តរជាតិ និងសាធារណជនទាំងអស់ មុននឹងធ្វេីការផ្សព្វផ្សាយព័ត៌មាន សូមធ្វេីការស្រាវជ្រាវ ឱ្យបានគ្រប់ជ្រុងជ្រោយ ដោយកុំធ្វេីការសន្និដ្ឋាន ដោយអត្តនោម័ត ដែលធ្វេីឱ្យប៉ះពាល់ដល់កិត្តិយស របស់កងកម្លាំងនគរបាលជាតិ និងធ្វេីឱ្យមានការវាយតម្លៃអវិជ្ជមាន ចំពោះកិច្ចប្រតិបត្តិការ របស់សមត្ថកិច្ច ដែលអំពេីនេះ គួរតែត្រូវបានបញ្ឈប់ជាបន្ទាន់ ៕
