ក្រុមអ្នកជំនាញវេជ្ជសាស្ត្រចិន ចុះពិនិត្យចំណុចខ្វះខាត នៃការទប់ស្កាត់ជំងឺវីរុសCOVID-19 ក្នុងតំបន់សេដ្ឋកិច្ចពិសេស ខេត្តព្រះសីហនុ
ភ្នំពេញ៖ ដើម្បីបណ្ដុះបណ្តាលកាន់តែច្បាស់លាស់ ស្តីអំពីកិច្ចប្រយុទ្ធប្រឆាំងជំងឺវីរុសCOVID-19 ជូនដល់តំបន់សេដ្ឋកិច្ចពិសេសខេត្តព្រះសីហនុ ហើយស្ថិតក្រោមកិច្ចសម្របសម្រួលរៀបចំពីស្ថានទូតចិនប្រចាំកម្ពុជា និងក្រសួងសុខាភិបាលប្រចាំកម្ពុជា នាថ្ងៃទី២៧ ខែមីនា ក្រុមអ្នកជំនាញវេជ្ជសាស្ត្រដែលជាក្រុមជំនួយរបស់ភាគីចិនជូនចំពោះភាគីកម្ពុជា បានអញ្ជើញចុះពិនិត្យអំពីចំណុចខ្វះខាតនៃការទប់ស្កាត់ជំងឺក្នុងខេត្តព្រះសីហនុ ហើយពួកគាត់បានណែនាំអំពីកិច្ចប្រយុទ្ធប្រឆាំងនឹងជំងឺវីរុសCOVID-19ក្នុងតំបន់សេដ្ឋកិច្ចពិសេសប្រចាំខេត្ត។ នេះបើតាមការផ្សាយរបស់ស្ថានទូតចិនប្រចាំកម្ពុជា។
ប្រភពដដែល បានបន្តថា នេះបានបង្ហាញឲ្យឃើញពីការយកចិត្តទុកដាក់ខ្ពស់ ដែលជាគំរូកិច្ចសហប្រតិបត្តិការជាក់ស្តែងរវាងចិន និងកម្ពុជា ផ្តល់ដោយរដ្ឋាភិបាលចិន និងរាជរដ្ឋាភិបាលកម្ពុជា ជូនចំពោះតំបន់សេដ្ឋកិច្ចពិសេសខេត្តព្រះសីហនុ។
លោក Cao Jianjiangប្រធានគ្រប់គ្រងទូទៅ នៃក្រុមហ៊ុនសេដ្ឋកិច្ចពិសេសខេត្តព្រះសីហនុ បានតំណាងឲ្យតំបន់សេដ្ឋកិច្ចពិសេសខេត្ត ស្វាគមន៍យ៉ាងកក់ក្តៅដល់វត្តមាន របស់ក្រុមអ្នកជំនាញវេជ្ជសាស្ត្រចិន ដែលដឹកកនាំដោយលោក Ai Xiang ប្រធានក្រុមអ្នកជំនាញវេជ្ជសាស្ត្រ និងជាអនុប្រធាននាយកដ្ឋានការពារសុខភាព នៃគណៈកម្មាធិការសុខាភិបាល និងសុខភាពក្នុងតំបន់ស្វយ័តជនជាតិZhuangនៃGuangxi ប្រទេសចិន។
លោកក៏បានថ្លែងអំណរគុណ យ៉ាងជ្រាលជ្រៅជូន ចំពោះរដ្ឋាភិបាល និងប្រជាពលរដ្ឋចិន និងព្រមទាំងរាជរដ្ឋាភិបាលកម្ពុជា ដែលបានផ្តល់ការយកចិត្តទុកដាក់យ៉ាងពិសេស ជូនដល់តំបន់សេដ្ឋកិច្ចពិសេសខេត្តព្រះសីហនុ។ លោកក៏បានណែនាំពីវិធានការទាំង៥ ចម្បង ក្នុងការទប់ស្កាត់នឹងជំងឺវីរុសCOVID-19ដែលបានកំណត់ដោយតំបន់សេដ្ឋកិច្ចពិសេសខេត្ត ជូនដល់ក្រុមអ្នកជំនាញវេជ្ជសាស្ត្រចិនឲ្យបានជ្រាប ក៏សង្ឃឹមថា ក្រុមអ្នកជំនាញអាចផ្តល់មតិណែនាំ ពីដំណាក់កាល បន្ទាប់ស្តីអំពីការទប់ស្កាត់នឹងជំងឺវីរុសប្រភេទថ្មីនេះ ជូនដល់តំបន់សេដ្ឋកិច្ចពិសេសខេត្ត។
លោកAi Xiangបានបង្ហាញការគាំទ្រចំពោះវិធានការបច្ចុប្បន្ន ដែលបានកំណត់ដោយតំបន់សេដ្ឋកិច្ចពិសេស នៃខេត្តព្រះសីហនុ។ ចំពោះកិច្ចទប់ស្កាត់ដំណាក់កាលបន្ទាប់ លោកក៏បានផ្តល់ជាមតិណែនាំចំនួន២។ ទី១គឺការបន្តពង្រឹងកម្លាំងផ្សព្វផ្សាយបន្ថែម ដើម្បីឲ្យអ្នកក្នុងតំបន់យល់កាន់តែច្បាស់ អំពីចំណុចសំខាន់ៗនៃការទប់ស្កាត់នឹងជំងឺវីរុស បង្កើនចំណេះដឹងការពារដោយខ្លួនឯង។ ទី២គឺ ការទប់ស្កាត់ហានិភ័យយ៉ាងម៉ឺងម៉ាត់។ ត្បិតតែបច្ចុប្បន្ននេះកម្ពុជាពុំទាន់មានការឆ្លងក្នុងតំបន់សហគមន៍ តែក្នុងឱកាសចូលឆ្នាំប្រពៃណីខ្មែរ ដែលនឹងខិតជិតមកដល់នាពេលខាងមុខនេះ នឹងជួបបញ្ហាជាមួយនឹងការលំហូរនៃមនុស្សជាដំណំ យើងត្រូវតែសហការជាមួយរាជរដ្ឋាភិបាលប្រចាំតំបន់ ដើម្បីពង្រឹងការតាមដាន និងគ្រប់គ្រងក្នុងកិច្ចការកាត់បន្ថយលំហូរនៃមនុស្ស និងការជួបជុំគ្នា ត្រូវតែពិនិត្យឲ្យឃើញពីជំងឺយ៉ាងទាន់ពេលវេលា ខណ្ឌរស់នៅដាច់ដោយឡែកយ៉ាងទាន់វេលា និងព្យាបាលយ៉ាងទាន់ពេលវេលា។
សមាជិកនៃអ្នកជំនាញវេជ្ជសាស្ត្រផ្សេងទៀត ក៏បានផ្តល់ជាមតិ និងយោបល់យ៉ាងចំគោលដៅ ស្តីអំពីរបៀបនៃការទប់ស្កាត់ជំងឺវីរុសក្នុងបរិវេណ នៃតំបន់សេដ្ឋកិច្ចពិសេសខេត្តព្រះសីហនុ៕