សត្វគោចំនួន៨ក្បាល ត្រូវរន្ទះបាញ់ងាប់
ខេត្តកំពង់ឆ្នាំង ៖ សត្វគោចំនួន៨ក្បាល ត្រូវរន្ទះបាញ់ងាប់តាំងពីម៉ោង១រំលងអធ្រាត្រឈានចូលថ្ងៃទី៨ ខែមេសា ឆ្នាំ២០២៣។ លុះព្រឹកឡើងថ្ងៃដដែល ខណៈពេលម្ចាស់ទៅមើល ក៏ស្រាប់តែឃើញ និងតក់ស្លុតជាខ្លាំង នៅពេលដែលគោរបស់ខ្លួនបានងា.ប់ជាច្រើនក្បាលបែបនេះ។
បើតាមលោក លន់ គង់ មេឃុំខុនរ៉ង ស្រុកបរិបូរណ៍ បានឱ្យដឹងតាមទូរស័ព្ទថា សត្វគោទាំង៨ក្បាលដែលត្រូវរន្ទះបា.ញ់ងា.ប់ខាងលើនេះ គឺមានម្ចាស់២នាក់ ដោយម្ចាស់ទី១- ឈ្មោះ នូ សវ៉ុន អាយុ៦១ឆ្នាំ ងា.ប់អស់គោ៦ក្បាល និងម្ចាស់ទី២- ឈ្មោះ អ៊ិន សំអៃ អាយុ៣៤ ឆ្នាំ ងា.ប់អស់គោ២ក្បាល។ ម្ចាស់គោទាំង២នាក់នេះ មានទីលំនៅភូមិសើរី ឃុំខុនរ៉ង ស្រុកបរិបូណ៌។
លោកបានបញ្ជាក់ថា ប្រជាពលរដ្ឋក្នុងឃុំខុនរ៉ង ជាទម្លាប់គឺទៅឃ្វាលគោនៅព្រៃក្រោម ក្បែរមាត់ទន្លេ លុះល្ងាចឡើងបានមកដេកនៅផ្ទះវិញនៅឯភូមិ មានចម្ងាយជាង២គីឡូម៉ែត្រពីទីទួលចំណុចផ្លូវតូច ដែលជាកន្លែងប្រមូលផ្ដុំចងគោក្របីទុកចោលនៅទីនោះ។ ប៉ុន្តែនៅយប់ថ្ងៃកើតហេតុ គឺមានខ្យល់លាយឡំជាមួយនឹងភ្លៀង ចាប់តាំងពីរំលងអធ្រាតឈានចូលថ្ងៃទី៨ ដោយមិនបានដឹងថា មានរន្ទះបាញ់គោងាប់នោះទេ។
លោកបញ្ជាក់បន្តថា លុះព្រឹកឡើង នៅពេលម្ចាស់គោទៅកន្លែងចងគោ ដើម្បីលែងឱ្យស៊ីស្មៅដូចរាល់ដង ស្រាប់តែឃើញគោចំនួន៨ក្បាលបានងាប់ ក្នុងចំណោមហ្វូងគោជាច្រើនក្បាល។ លោកមេឃុំ បន្ថែមថា គ្រួសារដែលមានគោងាប់ដោយសាររន្ទះបាញ់ គឺជាប្រជាពលរដ្ឋជួបការខ្វះខាត ហើយ ពួកគាត់ស្លុតចិត្តជាខ្លាំង នៅពេលឃើញគោរបស់គាត់ដែលជាទ្រព្យសម្បត្តិសន្សំ ត្រូវទៅបានងាប់អស់ ដោយសារតែរន្ទះបាញ់។ ក្រោយពេលកើតហេតុ សត្វគោដែលងាប់ទាំងអស់នោះ ត្រូវម្ចាស់លក់ទៅឲ្យទីសត្តឃាតក្នុងតម្លៃថោក ។
