សង្ស័យវិជ្ជមានវីរុសកូវីដ-១៩ លើ បុរសជនជាតិហុងគ្រីម្នាក់អាយុ៧០ឆ្នាំ ដែលបានរត់គេចចេញពីកន្លែងស្នាក់នៅ
ភ្នំពេញ៖ ក្រសួងសុខាភិបាលបានប្រកាសព័ត៌មានថា ថ្ងៃទី២៥ ខែកញ្ញា ឆ្នាំ២០២០ មិនមានករណីជាសះស្បេីយ និងមានករណីសង្ស័យវិជ្ជមានកូវីដ-១៩ ចំនួន ០១នាក់ ដែលបានរាយការណ៍ដោយមន្ទីរសុខាភិបាលខេត្តសៀមរាប (បច្ចុប្បន្ន កំពុងរងចាំការបញ្ជាក់បន្ថែមពីមន្ទីរពិសោធន៌វិទ្យាស្ថានប៉ាស្ទ័រកម្ពុជា រាជធានីភ្នំពេញ) បានរត់គេចចេញពីកន្លែងស្នាក់នៅក្នុងភូមិគ្រួស ឃុំស្វាយដង្គុំ ក្រុងសៀមរាប ខេត្តសៀមរាប មកទល់ពេលនេះ អាជ្ញាធររកមិនទាន់ឃេីញទេ។
សូមបងប្អូនប្រជាពលរដ្ឋ មេត្តាផ្តល់ព័ត៌មានមកអាជ្ញាធរមានសមត្ថកិច្ច មន្ទីរសុខាភិបាលខេត្ត ឫទាក់ទងលេខ ១១៥ ឫតាមលេខទូរស័ព្ទដែលមានផ្តល់ជូននៅក្នុងសេចក្តីជូនព័ត៌មានខាងក្រោមនេះ។
ប្រសិនបេីលោកអ្នកបានឃេីញបុរសជនជាតិហុងគ្រីអាយុ ៧០ឆ្នាំ នេះ ដែលអធិការដ្ឋាននគរបាលក្រុងសៀមរាប បានប្រកាសផ្សាយរកតាំងពីយប់ម៉ោងប្រហែលជា ២១និង១៥នាទីនៃថ្ងៃទី២៥ ខែកញ្ញា ឆ្នាំ២០២០ នេះរួចហេីយ។
ក្រសួងសុខាភិបាលបានឲ្យដឹងថា មានករណីសង្ស័យវិជ្ជមានវីរុសកូវីដ-១៥ ថ្មី នៅថ្ងៃទី២៥ ខែកញ្ញា ឆ្នាំ២០២០ ចំនួន ១នាក់ (គឺជាបុរសជនជាតិហុងគ្រី អាយុ ៧០ឆ្នាំ មានអាសយដ្ឋានស្នាក់នៅភូមិគ្រួស ឃុំស្វាយដង្គំ ក្រុងសៀមរាប ខេត្តសៀមរាប)ដែលបានរាយការណ៍ដោយមន្ទីរពិសោធន៍នៃមន្ទីរពេទ្យខេត្តសៀមរាប។ បុរសរូបនេះ ជាអ្នកធ្វើដំណើរពីប្រទេសបារាំង បន្តជើងហោះហើរតាមប្រទេសកូរ៉េខាងត្បូង បានមកដល់កម្ពុជានៅថ្ងៃទី១៣ ខែកញ្ញា ឆ្នាំ២០២០ ហើយលទ្ធផលតេស្តរបស់គាត់នៅពេលនោះ គឺអវិជ្ជមានវីរុសកូវីដ-១៩។ បន្ទាប់មកគាត់ត្រូវបានបន្តធ្វើចត្តាឡីស័កនៅ កន្លែងស្នាក់នៅរបស់តាមអាសយដ្ឋានខាងលើនេះ នៅខេត្តសៀមរាប រហូតដល់ថ្ងៃទី១៣នៃការធ្វើចត្តាឡីស័ក របស់គាត់ត្រូវនឹងថ្ងៃទី២៥ ខែកញ្ញា ឆ្នាំ២០២០ ការធ្វើតេស្តឡើងវិញក៏បានបង្ហាញលទ្ធផលសង្ស័យថា វិជ្ជមានវីរុសកូវីដ-១៩ ហើយហើយវត្ថុសំណាករបស់គាត់ត្រូវបានបញ្ជូន (មកដល់នៅវេលាយប់ម៉ោងប្រហែលជា ១១និង០០ យប់ នៃថ្ងៃទី២៥ ខែកញ្ញា ឆ្នាំ២០២០) ធ្វើការវិភាគបញ្ជាក់នៅវិទ្យាស្ថានប៉ាស្ទ័រកម្ពុជា រាជធានីភ្នំពេញ ហើយការ វិភាគរបស់វិទ្យាស្ថាននេះ នឹងធ្វើនៅវេលាព្រឹកនៃថ្ងៃទី២៦ ខែកញ្ញា ឆ្នាំ២០២០ រីឯលទ្ធផលរំពឹងថានឹងអាចទទួលបាននៅល្ងាចនៃថ្ងៃដដែល។
សូមជម្រាបជូនផងដែរថាទន្ទឹមនឹងពេលវេលាបញ្ជូនសំណាកនិងទន្ទឹងរង់ចាំការវិភាគបញ្ជាក់ពីភាពវិជ្ជមានវីរុសកូវីដ-១៩ ពីវិទ្យាស្ថានប៉ាស្ទ័រកម្ពុជា រាជធានីភ្នំពេញ ស្រាប់តែក្រុមការងារនៃមន្ទីរសុខាភិបាលខេត្តសៀមរាប មិនអាចទាក់ទងជាមួយបុរសរូបនេះបានឡើយ ដោយបុរសខាងលើនេះ បានរត់គេចចេញពីកន្លែងស្នាក់នៅខាងលើរបស់គាត់បាត់តែម្តង។ បច្ចុប្បន្ន អាជ្ញាធរមានសមត្ថកិច្ចខេត្តសៀមរាប កំពុងព្យាយាមរុករកបុរសជនជាតិហុងគ្រីរូបនេះ តែមិនទាន់រកឃើញនៅឡើយទេ។ប្រសិនបើនៅល្ងាចនៃថ្ងៃទី២៦ ខែកញ្ញា ឆ្នាំ២០២០នេះ លទ្ធផលវិភាគវត្ថុសំណាករបស់គាត់ ពិតជាឃើញ វិជ្ជមានវីរុសកូវីដ-១៩ មែននោះ ស្ថានភាពគេចវេសរបស់គាត់បែបនេះ (តាំងពីម៉ោងប្រហែលជា ៩យប់នៃថ្ងៃទី ២៥ ខែកញ្ញា ឆ្នាំ២០២០ រហូតមកទល់ពេលនេះ) នឹងអាចមានហានិភ័យឆ្លងដល់សហគមន៍ បើគាត់ធ្វើដំណើរ ច្រើន និងជួបមនុស្សច្រើន។ ក្រុមឆ្លើយតបបន្ទាន់ និងធ្វើការស្រាវជ្រាវភ្លាមៗ នៅពេលរកឃើញបុរសនេះ។
អាស្រ័យដូចបានជម្រាបជូនខាងលើ សូមសាធារណជនមេត្តាជ្រាប ហើយប្រសិនបើមានលោកអ្នកណា បានឃើញ ឬដឹងព័ត៌មានអំពីបុរសជនជាតិហុងគ្រីអាយុ ៧០ឆ្នាំនេះ សូមលោកអ្នក មេត្តាជួយផ្តល់ព័ត៌មានឲ្យបានឆាប់ជាទីបំផុតមកអាជ្ញាធរមានសមត្ថកិច្ច (មានការអំពាវនាវស្រាវជ្រាវរករបស់អធិការដ្ឋានស្នងការនគរបាលក្រុង សៀមរាបតាំងពីយប់ម៉ិញ) ឬតាមលេខ ១១៥ ឬតាមលេខទូរស័ព្ទខាងក្រោមនេះ ដើម្បីក្រសួង អាចចាត់វិធានការសុខាភិបាល បានទាន់ពេលវេលា ហើយបងប្អូនដែលបានប៉ះពាល់ជាមួយបុរសខាងលើនេះ សូមចូលរួមមកបង្ហាញខ្លួន នៅមន្ទីរសុខាភិបាលខេត្តសៀមរាប ដើម្បីធ្វើតេស្តរកវីរុសកូវីដ-១៩ ដើម្បីរួមគ្នាអាចនឹងបញ្ចៀសបាននូវការចម្លង ចូលសហគមន៍៕
