ឃាត់ខ្លួនជនសង្ស័យជា ក្មេងទំនើងចំនួន២នាក់ ជាបន្តបន្ទាប់ ពាក់ពន្ធ័ករណី បប្រើកាំបិតកាប់លើជនរងគ្រោះដាច់ម្រាមដៃ នឹងប្រើប្រាស់សារធាតុញៀនដោយខុសច្បាប់
ក្រុងសៀមរាប ៖ អធិការដ្ឋាននគរបាលក្រុងសៀមរាប បានឲ្យដឹងថា កាលពីវេលាម៉ោង៥ទៀបភ្លឺ ថ្ងៃទី៤ ខែតុលា ឆ្នាំ២០២០កន្លងទៅ ខណៈជនរងគ្រោះឈ្មោះយ ឌ ណ ភេទប្រុស អាយុ២៨ឆ្នាំ ដើរមកពីដាក់សន្ទូចរកត្រី ហើយបែរភ្លើងពិល ត្រូវលើ ក្រុមជនសង្ស័យមួយក្រុម ដែលកំពុងនាំគ្នាជក់ថ្នាំញៀន បណ្តាលអោយក្រុមជនសង្ស័យខឹង ហើយនាំគ្នា ជិះម៉ូតូនិងប្រើកាំបិត តាមរកនិងកាប់ជនរងគ្រោះ បណ្តាលរងរបួសដាច់ម្រាមដៃឆ្វេងចំនួន៣ របួសត្រង់ដើមដៃ នឹងកំភួនដៃខាងស្តាំដេរសរុប១៩ថ្នេរ នៅចំណុច ភូមិអារញ្ញ សង្កាត់សៀមរាប ក្រុងសៀមរាប ខេត្តសៀមរាប ។
បន្ទាប់ពីទទួលបានពាក្យបណ្តឹងរបស់ជនរងគ្រោះ និងដោយមានការណែនាំពីលោកវរសេនីយ៍ឯកណុប សារ៉ាក់ អធិការនៃអធិការដ្ឋាននគរបាលក្រុងសៀមរាប ភ្លាមៗ កម្លាំងនគរបាលប៉ុស្តិ៍រដ្ឋបាលសង្កាត់សៀមរាប សហការជាមួយកម្លាំងនគរបាលផ្នែកព្រហ្មទណ្ឌ ដឹកនាំប្រតិបត្តិការផ្ទាល់លោកវរសេនីយ៍ទោនួន សក្តិ័ចំរើនរិទ្ធ អធិការរងទទួលព្រហ្មទណ្ឌ បានចុះដល់កន្លែងកើតហេតុ និងធ្វើការស្រាវជ្រាវ រហូតកំណត់បានមុខសញ្ញាសង្ស័យ នឹងឈានដល់ឃាត់ខ្លួនជនសង្ស័យទី១ ឈ្មោះហេង គឹមឡាយ ភេទប្រុស អាយុ១៧ឆ្នាំរស់នៅភូមិអារញ្ញ សង្កាត់សៀមរាប ក្រុងសៀមរាប ខេត្តសៀមរាប មកធ្វើការសាកសួរនាំ។ ហើយនៅថ្ងៃបន្ទាប់ វេលាម៉ោង១៧:៣០នាទី ថ្ងៃទី០៥ខែតុលា ឆ្នាំ២០២០ យើងបានបន្តនីតិវិធី នាំខ្លួនជនសង្ស័យម្នាក់ទៀតឈ្មោះសួន សាក់ ភេទប្រុស អាយុ២០ឆ្នាំរស់នៅភូមិកក្រាញ់ សង្កាត់សៀមរាប ក្រុងសៀមរាប ខេត្តសៀមរាបមកសាកសួរនាំបន្ត។
ជនសង្ស័យខាងលើបានឆ្លើយសារភាពថា ខ្លួនពិតជាបានចូលរួមជាមួយបក្ខពួកមានគ្នាសរុប៤នាក់ ជក់ថ្នាំញៀននាថ្ងៃកើតហេតុពិតមែន ស្រាប់តែជនរងគ្រោះបានដើរមកក្បែរហើយ ឆួលពិលមកលើពួកគេ ដោយសារខឹងជនរងគ្រោះ ក្រុមខ្លួនក៏បាននាំគ្នាជិះម៉ូតូចំនួន០២គ្រឿង ទៅរកជនរងគ្រោះ ពេលឃើញជនរងគ្រោះ ឈ្មោះរាក់ ភេទប្រុស អាយុ២០ឆ្នាំ បានធ្វើសកម្មភាពកាប់លើជនរងគ្រោះ ចំណែកឈ្មោះគល់ ភេទប្រុស អាយុ២០ឆ្នាំ(ជាអ្នកដឹកឈ្មោះរាក់) ឈ្មោះសាក់ និងឡាយ ជិះម៉ូតូចាំនៅខាងក្រៅផ្ទះ ជនរងគ្រោះ ពេលធ្វើសកម្មភាពរួចបក្ខពួកខ្លួន បាននាំគ្នាគេចខ្លួនអស់។
ក្រោយ ធ្វើការសាកសួរ យើងបានធ្វើតេស្តរកសារធាតុញៀនលើទឹកនោមជនសង្ស័យ ជាលទ្ធផលវិជ្ជមាន។ ចំណែកបក្ខពួកជនសង្ស័យចំនួន០២នាក់ទៀត យើងបានធ្វើការកំណត់អត្តសញ្ញាណ រួចហើយ។
ជនសង្ស័យនិងវត្ថុតាង ត្រូវបានកម្លាំងនគរបាលនៃអធិការដ្ឋាននគរបាលក្រុងសៀមរាប កសាងសំណុំរឿងបញ្ជូនទៅតុលាការដើម្បីចាត់ការផ្ដន្ទាទោស តាមផ្លូវច្បាប់ និងសុំគោលការណ៍តាមស្វែងរកចាប់ខ្លួនបន្តទៀត៕ ដោយ៖កូឡាប