ឃុំខ្លួនមនុស្សចំនួន១៣នាក់ ករណីលួចធ្វើប្រតិបត្តិការ ជីកយករ៉ែ ដោយគ្មានអាជ្ញាប័ណ្ណធនធានរ៉ែ

ស្ទឹងត្រែង៖ លោក ហេង សុខជាចៅក្រមស៉ើបសួរ នៃសាលាដំបូងខេត្តស្ទឹងត្រែង នៅថ្ងៃទី២៨ ខែកក្កដា ឆ្នាំ២០២១នេះ បានចេញដីកាបង្គាប់ឲ្យឃុំខ្លួនមនុស្ស១៣នាក់ លួចធ្វើអាជីវកម្មរ៉ែដោយខុសច្បាប់ ដាក់ពន្ធនាគារ ។ ជនជាប់ចោទទាំង១៣នាក់ ត្រូវបានចៅក្រមស៉ើបសួរ នៃសាលាដំបូងខេត្តស្ទឹងត្រែង ដាក់ឲ្យស្ថិតក្រោមការពិនិត្យពីបទ «ធ្វើប្រតិបត្តិការជីកយករ៉ែដោយគ្មានអាជ្ញាប័ណ្ណធនធានរ៉ែ» ប្រព្រឹត្តនៅចំណុចភូមិអន្លង់ស្វាយ ឃុំអូររ៉ែ ស្រុកថាឡាបរិវ៉ាត់ ខេត្តស្ទឹងត្រែង កាលពីថ្ងៃទី២៤ ខែកក្កដា ឆ្នាំ២០២១ តាមបញ្ញត្តិមាត្រា៣៥ថ្មី កថាខណ្ឌ១ និងកថាខណ្ឌ២ នៃច្បាប់ស្ដីពីការគ្រប់គ្រង និងការធ្វើអាជីកម្មធនធានរ៉ែ។

សូមជម្រាបថា កម្លាំងកងរាជអាវុធហត្ថខេត្តស្ទឹងត្រែង​ បានបើកប្រតិបត្តិការបង្ក្រាប ទីតាំងធ្វើអាជីវកម្មរ៉ែខុសច្បាប់ នៅចំណុចភូមិអន្លុងស្វាយ ឃុំអូររៃ និងភូមិចម្ការលើ ឃុំចម្ការលើ ស្រុកថាឡាបរិវ៉ាត់ ខេត្តស្ទឹងត្រែង ដោយចាប់ខ្លួនបានមនុស្សសរុប១៥នាក់ជាបន្ដបន្ទាប់ និងម៉ាស៉ីនខួងធុនធំជាច្រើនគ្រឿង នៅថ្ងៃទី២៤-២៥ ខែកក្កដា ឆ្នាំ២០២១។

ប្រតិបត្តិការនេះធ្វើឡើងក្រោមការបញ្ជាផ្ទាល់ពី នាយឧត្តមសេនីយ៍ សៅ សុខា អគ្គមេបញ្ជាការរង មេបញ្ជការកងរាជអាវុធហត្ថលើផ្ទៃប្រទេស និងប្រធានគណៈកម្មាធិការជាតិបង្ក្រាបបទល្មើសធនធានធម្មជាតិ និងដឹកនាំប្រតិបត្តិការដោយលោកឧត្តមសេនីយ៍ត្រី អៀង វ៉ាន់ឌី មេបញ្ជាការអាវុធហត្ថខេត្ត ដែលមានការសម្របសម្រួលពីលោក ជា សុភ័ក្ដ្រ ព្រះរាជអាជ្ញារង នៃអយ្យការអមសាលាដំបូងខេត្តស្ទឹងត្រែង។

ប្រតិបត្តិការនេះធ្វើឡើងរយៈពេល២ថ្ងៃជាប់គ្នា ដោយនៅថ្ងៃទី២៤ ខែកក្កដាម្សិលមិញ បង្ក្រាបនៅភូមិអន្លុងស្វាយ ឃុំអូររៃ ស្រុកថាឡាបរិវ៉ាត់ ចាប់ខ្លួនមនុស្សបាន៧នាក់ ដែលជនល្មើសបានកំពុងធ្វើសកម្មភាពបើកការដ្ឋានខួងអណ្តូងរករ៉ែចំនួន៣កន្លែង។ ដោយឡែក នៅថ្ងៃទី២៥ ខែកក្កដានេះ ចំណុចភូមិចម្ការលើ ឃុំចម្ការលើ ឃាត់ខ្លួនជនសង្ស័យចំនួន៨នាក់។

ទីតាំងនេះបានធ្វើអាជីវកម្មរ៉ែដោយលួចលាក់ និងដាក់ម៉ាស៊ីនខួងដើម្បីយករ៉ែ ដោយគ្មានច្បាប់អនុញ្ញាត។ នៅពេលសមត្ថកិច្ចចុះបង្ក្រាប គេសង្កេតឃើញមានបក្ខពួកផ្សេងទៀតរបស់ក្រុមជនល្មើសទាំងអស់ រត់ខ្វែងខ្វាត់ដើម្បីអន្ដរាគមន៍ចំពោះអំពើល្មើសច្បាប់នេះផងដែរ។

លោក ជេត ខេមរា ព្រះរាជអាជ្ញា នៃអយ្យការអមសាលាដំបូងខេត្ត បានបញ្ជាឲ្យកម្លាំងអាវុធហត្ថខេត្តស្ទឹងត្រែង បន្តរុករកម៉ាស៊ីនខួង និងសម្ភារបម្រើឲ្យមធ្យោបាយបទល្មើសខុសច្បាប់បន្ថែមទៀត ព្រមទាំងកសាងសំណុំរឿង បញ្ជូនទៅតុលាការផ្ដន្ទាទោសតាមច្បាប់៕​