ប្រជាពលរដ្ឋអ្នកទិញផ្ទះល្វែងបុរី (VIP) នៅខណ្ឌដង្កោ ប្រមូលផ្ដុំគ្នាលើកបដា និងបិទផ្លូវ២១៧ ទាមទារឲ្យម្ចាស់បុរីចេញមុខដោះស្រាយជាមួយពួកគាត់ជាបន្ទាន់
រាជធានីភ្នំពេញ ៖ ក្រុមប្រជាពលរដ្ឋអ្នកទិញផ្ទះល្វែងបុរី VIP ស្ថិតនៅក្នុងភូមិម៉ឺនត្រា សង្កាត់ស្ពានថ្ម ខណ្ឌដង្កោ រាជធានីភ្នំពេញ បានប្រមូលផ្ដុំគ្នាធ្វើការតវ៉ាបិទផ្លូវលេខ២១៧ ត្រង់ចំណុចមុខបុរីខាងលើនៅព្រឹកថ្ងៃទី០៥ ខែមិនា ឆ្នាំ២០២៣។ ពួកគាត់ទាមទារឲ្យម្ចាស់បុរីចេញមុខដោះស្រាយជាមួយពួកគាត់ជាបន្ទាន់ ក្រោយពីទិញផ្ទះរយៈពេលច្រើនឆ្នាំហើយ អ្នកខ្លះទទួលបានផ្ទះហើយតែអត់ប័ណ្ណកម្មសិទ្ធិ។ ចំណែកអ្នកខ្លះបង់លុយគ្រប់អស់ហើយ ប៉ុន្តែផ្ទះនៅជញ្ជាំងឥដ្ឋក្រហមពុំទាន់សង់រួច រីឯខ្លះទៀតក៏ពុំដឹងថាផ្ទះនៅឯណាផង។
ប្រជាពលរដ្ឋ បានកាន់រូបថតសម្ដេចអគ្គមហាសេនាបតី តេជោ ហ៊ុន សែន និងសម្ដេចកិតិព្រឹទ្ធបណ្ឌិតប៊ុន រ៉ានី ហ៊ុន សែន ព្រមទាំងបដាទាមទារឲ្យម្ចាស់បុរីចេញមុខដោះស្រាយជាមួយ ពួកគាត់ ហើយពួកគាត់ក៏បានសុំឲ្យសម្ដេចទាំងទ្វេរមេត្តាជួយគាត់ផងដែរ ។ បន្ទាប់ពីមានការតវ៉ាបិទផ្លូវពីប្រជា ពលរដ្ឋបែបនេះ កម្លាំងអាជ្ញាធរនិងសមត្ថកិច្ចខណ្ឌដង្កោ បានចុះទៅសម្រួលឲ្យអ្នកដំណើរធ្វើចរាចរណ៍វាងទៅតាមផ្លូវនានា ដែលអាធ្វើដំណើរទៅបានដើម្បីចៀសវាងការកកស្ទចរាចរណ៍នៅតាមផ្លូវខាងលើនេះ។
ក្រុមអ្នកតវ៉ាខាងលើបាននិយាយថា ពួកគាត់បានទិញផ្ទះល្វែងបុរី វី អាយ ភី នេះពីឈ្មោះហម រ៉ន និងឈ្មោះវ៉ន ណាក់ ដែលជាម្ចាស់បុរីនោះ ហើយបានបង់ប្រាក់តាមកិច្ចសន្យាជាបន្តបន្ទាប់ចាប់តាំងពីឆ្នាំ២០១៨ មកម្ល៉េះ ។ នៅពេលក្រុមហ៊ុនចាប់ផ្ដើមបុកគ្រឹះសាងសង់និងប្រកាសលក់ផ្ទះ ពួកគាត់ក៏បានចូលទៅទិញភ្លាម ហើយបានបង់ប្រាក់ជាដំណាក់កសលៗ រហូតគ្រប់ចំនួនអស់ហើយ ។ក្រោយមកអ្នកខ្លះក៏ទទួលបានផ្ទះសាង សង់រួចរាល់ តែអត់មានប័ណ្ណកម្មសិទ្ធិ ចំណែកអ្នកខ្លះទៀតផ្ទះក៏សង់អត់ទាន់រួចហើយក៏អត់ទាំងប័ណ្ណកម្មសិទ្ធិទៀត ផង ពេលសួរនាំម្ចាស់បុរីនេះឆ្លើយដោះសារលេស១០០០លេសតែម្ដង និងគិតតែពីទារឲ្យបង់លុយថែមរហូតថែមទៀតផង។
ប្រជាពលរដ្ឋបានប្រាប់ថា គាត់បាននាំគ្នាចេញតវ៉ាបិទផ្លូវ ២១៧ ក្នុងគោលបំណងទាមទារឲ្យម្ចាស់បុរីមួយនេះចេញមុខមកទទួលខុសត្រូវ ផ្តល់ប័ណ្ណកម្មសិទ្ធិប្លង់ស្របច្បាប់កាន់កាប់ផ្ទះ និងប្លង់បំបែកក្បាលដីជូនពួកគាត់។ មិនត្រូវឲ្យប្រជាពលរដ្ឋបង់លុយបន្ថែមលើការរត់ប្លង់ពីឡើយ ដែលទង្វើនេះផ្ទុយពីកិច្ចសន្យាទិញលក់-ដី/ផ្ទះកាលពីលើកដំបូង និងឈប់រកស៊ីបោកប្រាស់បែបនេះតទៅទៀត។ម្យ៉ាងទៀត ពួកគាត់ក៏សំណូមពរឲ្យអាជ្ញាធរគ្រប់លំដាប់ថ្នាក់ជួយរកដំណោះស្រាយបញ្ចប់ឲ្យពួកគាត់ផង កុំឲ្យការដោះស្រាយចេះតែអូសបន្លាយពេលរហូតបែបនេះ ព្រោះពួកគាត់តវ៉ាច្រើនលើកមកហើយប៉ុន្តែការដោះស្រាយហាក់អត់មានអីប្លែកសោះ។
អ្នកទិញផ្ទះនៅបុរី (VIP) នេះបានធ្វើការតវ៉ាបិទផ្លូវបែបនេះដែរ ជាហូរហែច្រើនលើករួចមកហើយ ដោយឡែកអាជ្ញាធររាជធានីភ្នំពេញ និងខណ្ឌដង្កោ បានសម្របសម្រួលនៅក្រៅប្រពន្ធតុលាការក៏ច្រើនលើកដែរ ប៉ុន្តែពុំបានធ្វើឲ្យវិវាទមួយនេះសះជាបាននោះទេ ។កាលពីថ្ងៃទី២២ ខែកុម្ភៈ ឆ្នាំ២០២៣ សាលារាជធានីភ្នំពេញក៏បានសេចក្ដីប្រកាសព័ត៌មានស្ដីពីលទ្ធផលនៃការប្រជុំដោះស្រាយវិវាទនេះផងដែរ ដោយបញ្ជាក់ថា វិវាទនេះមានលក្ខណៈស្មុគស្មាញនិងពាក់ព័ន្ធច្រើន៕
