ពលរដ្ឋជាង ២០០គ្រួសារ នៅខេត្តតាកែវ ស្នើសម្តេចតេជោ ហ៊ុន សែន អន្តរាគមន៍ពាក់ព័ន្ធនឹងការអភិវឌ្ឍអាងទឹកស្វាយខម ទំហំ ៨០៥ហិកតា ដែលប៉ះពាល់ដីធ្វើស្រែ
ភ្នំពេញ៖ តំណាងប្រជាពលរដ្ឋ ជាង២០០គ្រួសារ ស្ថិតក្នុងភូមិសាស្ត្រឃុំដូង ឃុំចំប៉ី និងឃុំពារាម ស្រុកបាទី ខេត្តតាកែវ បានដាក់លិខិតគោរពជូនសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា មេត្តាជួយអន្តរាគមន៍ពាក់ព័ន្ធនឹងការអភិវឌ្ឍអាងទឹកស្វាយខម ទំហំប្រមាណ ៨០៥ហិកតា ដែលពួកគេអះអាងថា គ្មានតម្លាភាព និងគ្មានយុត្តិធម៌។
តាមរយៈលិខិត ប្រជាពលរដ្ឋ អះអាងថា បានកាន់កាប់ និងអាស្រ័យផល ដីក្នុងភូមិសាស្ត្រខាងលើ ៣០ឆ្នាំហើយនោះ ត្រូវបានអាជ្ញាធរខេត្ត និងមន្ទីរធនធានទឹកខេត្តតាកែវ ឯកភាពករណីសំណើរបស់ក្រុមហ៊ុន ធីភីម៉ូរ៉ាល់ (ឯ.ក) សុំធ្វើការអភិវឌ្ឍអាងទឹកស្វាយខម ធ្វើឲ្យប៉ះពាល់ដីស្រែបង្កបង្កើនផលស្រូវប្រាំង និងស្រូវវស្សាជាច្រើនគ្រួសារ។ បញ្ហានេះ តំណាងប្រជាពលរដ្ឋ ក៏ធ្លាប់ដាក់លិខិតបំភ្លឺ ទៅលោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម រួចហើយដែរ តាំងពីថ្ងៃទី១៥ ខែកុម្ភៈ ឆ្នាំ២០២៣៕
